PREZİDENT İLHAM ƏLİYEV “BÖYÜK OYUN TƏKRARLANIR” DEVİZİ İLƏ KEÇİRİLƏN İCLASDA İŞTİRAK ETMİŞDİR
Yanvarın 29-da Davos forumu çərçivəsində “Böyük oyun təkrarlanır” devizi altında xüsusi iclas keçirilmişdir. İclasda Azərbaycan Prezidenti İlham Əliyev, Türkiyənin Baş naziri Rəcəb Tayyib Ərdoğan, İranın xarici işlər naziri Məniçehr Mottəki, Ermənistanın xarici işlər naziri Edvard Nalbandyan iştirak etmişlər.
İclası açan “Avrasia Group” şirkətinin prezidenti Yan Bremmer Azərbaycan Prezidentini, Türkiyə Baş nazirini və digər qonaqları salamlayaraq, “Böyük oyun təkrarlanır” mövzusunun təsadüfi seçilmədiyini və müzakirələrin səmərəli keçəcəyinə əminliyini bildirmişdir.
Aparıcı Azərbaycan və Türkiyənin Avropaya inteqrasiya yolunu tutduqlarını vurğulamış, Azərbaycan Prezidenti İlham Əliyevə “Avropada ikili standartlar mövcuddurmu?” sualı ilə müraciət etmişdir.
Prezident İlham Əliyev cavabında bildirmişdir ki, 1991-ci ildən Azərbaycan müstəqil siyasət həyata keçirir. Avropa İttifaqı ilə Azərbaycan Yeni qonşuluq siyasətinə dair fəaliyyət planı, enerji məsələləri üzrə strateji tərəfdaşlığa dair memorandum imzalamışdır. Bütün bunlar Azərbaycan və Avropa arasında əlaqələrin inkişafını göstərir. Avropa ölkələri ilə əlaqələr qarşılıqlı anlaşmaya söykənir və bu, davam edəcəkdir.
Prezident İlham Əliyev ikili standartların hər yerdə mövcud olduğunu bildirmiş, Azərbaycanla Avropa İttifaqı arasında işbirliyinin müsbət olduğunu və bunun davam edəcəyinə əminliyini vurğulamışdır.
Baş nazir Rəcəb Tayyib Ərdoğan Türkiyənin Avropa İttifaqına üzvlüyü məsələsinə toxunmuş, bu istiqamətdə fəaliyyətin davam etdiyini söyləmişdir. Hər zaman problemlərin yaşandığını bildirən Ərdoğan demişdir ki, Avropa İttifaqının Gömrük Birliyinə üzv olan Türkiyəyə dostlarının baxışları müsbət olmalıdır və ümid edirəm ki, belə də olacaqdır.
İranın xarici işlər naziri Məniçehr Mottəki də ABŞ-ın İrana münasibətlərində dəyişikliklərin baş verməsinin strateji və taktiki ola bilməsi fikrini vurğulamışdır. İranın bölgədə sülhün bərqərar olmasına çalışdığını, dünyada işbirliyinin güclənməsi üçün səylərini artırdığını deyən nazir ümidvar olduğunu bildirmişdir ki, ABŞ-ın yeni rəhbərliyi siyasətini sözdə yox, işdə dəyişdirəcək və bölgədə əməkdaşlıq yeni vüsət alacaqdır.
Türkiyənin Baş naziri Rəcəb Tayyib Ərdoğan Rusiya ilə bağlı suala cavabında demişdir ki, Rusiya ilə Gürcüstan arasında məlum münaqişədən sonra Türkiyə Qafqazda sülh və təhlükəsizlik platforması ideyasını irəli sürdü. Bundan məqsəd bölgədə təhlükəsizliyə, əmin-amanlığa nail olmaqdır. İnanırıq ki, Rusiya bundan sonra da bu istiqamətdə səylərini artıracaqdır.
Azərbaycan Prezidenti İlham Əliyev aparıcının “Böyük oyundan bəhs edərkən enerji məsələsindən qaçmaq olarmı?” və “Avropa Rusiyadan qaz asılılığını azaltmağa çalışır və Siz Nabukko layihəsinin gələcəyinə necə baxırsınız?” suallarına cavabında demişdir ki, biz xarici şirkətlərlə əməkdaşlıq və tərəfdaşlıq nəticəsində təbii sərvətləri dünya bazarına çıxarırıq. Bu gün Azərbaycanın 7 neft və qaz boru xətti vardır. Xarici bazara neft və qaz ixrac olunur. Azərbaycan enerji ölkəsi kimi mühüm rol oynayır. Azərbaycan təkcə tranzit yox, həm də ixracçı ölkədir. Azərbaycanda zəngin yataqlar vardır.
Ermənistanın xarici işlər naziri Edvard Nalbandyan ölkəsinin iqtisadi layihələrdə iştirakdan kənarda qalması ilə bağlı suala cavabında demişdir ki, bölgədə heç bir ölkə layihədən kənarda qala bilməz. Ermənistan sərfəli tranzit yolu olsa da, təəssüf ki, beynəlxalq layihələrdə iştirak edə bilmir.
Türkiyə-Ermənistan münasibətləri məsələsi ilə bağlı o, əlaqələrin yaxşı davam etdiyini, bunun müsbət nəticələnəcəyinə, Türkiyə və Ermənistanın xeyrinə olacağına inandığını söyləmişdir.
Türkiyənin Baş naziri Rəcəb Tayyib Ərdoğan da bütün hədəflərin bölgədə sülhə nail olmağa yönəldiyini vurğulayaraq demişdir ki, bunda bütün tərəflər maraqlı olmalıdır. Bu işlərdə diasporlara ehtiyac yoxdur və öz problemlərimizi özümüz həll etməliyik.
Rəcəb Tayyib Ərdoğan Ermənistan ilə Azərbaycan arasında münaqişənin hələ də həllini tapmadığını, ATƏT-in Minsk qrupunun fəaliyyətinin heç bir nəticə vermədiyini də xatırlatmışdır. Baş nazir Qafqazda sülh və təhlükəsizlik platforması ideyasının bu səbəbdən meydana gəldiyini bildirərək demişdir ki, bu işlərə kənar qüvvələrin cəlb olunması qəbuledilməzdir.
Azərbaycan Prezidenti İlham Əliyev bildirmişdir ki, bizim Ermənistanla əlaqələrimiz yoxdur. Səbəb isə Ermənistan tərəfinin Azərbaycan torpaqlarını işğal etməsidir. Amma müzakirələr aparılır, nəticə isə yoxdur. Azərbaycanın ərazi bütövlüyü bərpa olunmayınca əməkdaşlıq mümkün deyildir. Torpaqlar azad edilməli, BMT-nin prinsipləri qəbul olunmalı, sərhədlər tanınmalıdır.
İranın xarici işlər naziri Məniçehr Mottəki İranın Orta Asiya və Qafqaz ölkələri ilə əlaqələrinin gələcəyi barədə suala cavabında demişdir ki, bölgədə siyasi dialoqa ehtiyac duyulur. Əsasən də enerji təhlükəsizliyi məsələsinin müzakirəsinə ehtiyac vardır.
“Gürcüstan Prezidenti Mixeil Saakaşviliyə 2009-cu ildə nə kimi tövsiyəniz var?” sualına cavabında Azərbaycan Prezidenti İlham Əliyev demişdir ki, Gürcüstan ilə Azərbaycan arasında mühüm layihələr keçirilir. Bunun Avropanın enerji təhlükəsizliyinə xeyri vardır. İkitərəfli münasibətlər inkişaf edir. Mən Gürcüstan rəhbərliyinə və xalqına uğurlar arzulayıram. Azərbaycan qonşu Gürcüstanı dəstəkləmək üçün əlindən gələni edəcəkdir. Azərbaycan Gürcüstana 3 milyard dollar sərmayə qoymuşdur. Bu işləri Azərbaycan Respublikası Dövlət Neft Şirkəti uğurla həyata keçirir. İki ölkə arasında əlaqələr nə qədər yaxşı olsa, bunun bir o qədər faydası vardır. Bu, bölgənin inkişafına və əməkdaşlığa töhfə verəcəkdir.
Sonda Türkiyənin Baş naziri Rəcəb Tayyib Ərdoğan İpək yolu layihəsi çərçivəsində Azərbaycan-Gürcüstan-Türkiyə əməkdaşlığına, Bakı-Tbilisi-Qars dəmir yolu xəttinin çəkilişi məsələlərinə toxunmuşdur. Türkiyənin Yaxın Şərqdəki siyasətindən danışaraq bildirmişdir ki, Türkiyə bölgədə sabitlik üçün bütün təşəbbüslərə qoşulur və bu yöndə əlindən gələni edəcəkdir.
X X X
Azərbaycan Prezidenti İlham Əliyevin İsveçrəyə səfəri davam edir.
######
 |
 |
Bölmənin digər xəbərləri
