QAFQAZ MÜSƏLMANLARI İDARƏSİNİN SƏDRİ ŞEYXÜLİSLAM ALLAHŞÜKÜR PAŞAZADƏNİN ÇIXIŞI
- Bismillahir-rəhmanir-rəhim!
Zati aliləri, çox hörmətli Prezident həzrətləri!
Hörmətli din qardaşlarım!
Əziz qonaqlar!
Sizi bu gün salamlayıram, Ramazan ayında, bu müqəddəs ayda öz iqamətgahımda Sizə “Xoş gəlmisiniz!” deyirəm və Allah-Təaladan xoşbəxtlik, firavanlıq arzu edirəm. Zati-aliləri, Allah-Təaladan arzum budur ki, Sizin şəxsiyyətinizlə Azərbaycan xalqı firavan, əmin-amanlıqda yaşasın və ruzili olsun. Ən ümdə, ən böyük arzumuz ondan ibarətdir ki, Sizin rəhbərliyinizlə tezliklə Qarabağ torpaqları azad edilsin.
Bu gün müqəddəs aydır. Sizin gəlişiniz bizə çox böyük şərəf, xoşbəxtlik və səadət bəxş etmişdir. Ramazan ayı, bu müqəddəs ay Qurani-Şərifin nazil olduğu aydır. Ruhların azad olan ayıdır. Bu ay qardaşlıq, dostluq, mərhəmət, bir-birinə kömək ayıdır. Ona görə Siz bu gün bizim süfrəmizin başında oturduğunuz, bu məclisdə iştirak etdiyiniz üçün hesab edirəm ki, bütün Azərbaycan xalqına, onun mənəviyyatına çox böyük qiymət verirsiniz. Bütün Azərbaycan müsəlmanları və dindarları Sizdən razıdırlar. İstərdim, bu gəlişinizə görə bütün müsəlmanlar, dindarlar adından Sizə, habelə qonaqlarımıza öz minnətdarlığımı bildirim.
Ramazanın əsas mahiyyətlərindən biri də insanları bir yerə cəm etmək, onlar arasında qardaşlıq, mehribançılıq yaratmaqdır. Mən deyə bilərəm ki, bu görüşün, bu süfrənin özü də rəmzi xarakter daşıyır. Əsas məqsəd bundan ibarətdir ki, Azərbaycan xalqı həmişə tolerantlığı, hörməti sevmiş, hörmət etməyi bacarmışdır. Bu gün biz bu süfrənin arxasında millətindən, dinindən asılı olmayaraq cəm olmuşuq. Bu o deməkdir ki, Azərbaycanda tolerantlıq vardır, Azərbaycan xalqı birlikdə yaşamağı bacarır və belə bir xalqın da, inşallah, gələcəyi vardır.
Dövlətimizin qurucusu, ulu öndərimiz Heydər Əliyev həzrətləri tolerantlığın banisidir. O, müstəqil Azərbaycanı xoşbəxt görmək istəyirdi, ölkəmizin gələcəyini düşünürdü. Deyə bilərəm ki, o, mənə dostum, qardaşım deyəndə, mən də ona dostum, qardaşım kimi münasibət bəsləmişəm. İndi o, bu dünyada yoxdursa da, onun ruhu bizimlədir. Allah onun ruhunu şad eləsin. O, Azərbaycanın gələcəyi üçün öz həyatını qurban verdi, Azərbaycanın xoşbəxtliyi üçün əlindən gələni etdi. Ən müqəddəs olan bir oğlunu da Azərbaycanın xoşbəxtliyi üçün insanlara, xalqa bəxş etdi. O da Azərbaycanın gələcəyini, firavanlığını düşünərək, müstəqil Azərbaycanı gələcəyə aparmaq üçün bu yolu keçdi. Əlbəttə, insanlar yaxşı ilə pisi gözəl seçirlər. Biz dindarlar da bunu çox gözəl seçirik və qiymət veririk.
Prezident həzrətləri, biz öz seçimimizi düzgün etmişik. Prezident seçkilərində bütün dindarlar Sizə səs verdilər. Onlar Sizə inanırdılar. Çünki bizə belə bir məsləhəti ulu öndərimiz Heydər Əliyev həzrətləri vermişdir. Allah ona rəhmət etsin. O bizə demişdi ki, mənə inandığınız kimi, oğlum İlham Əliyevə də inanın. Biz də Sizə, gələcəyinizə inanırıq, Sizinlə fəxr edirik.
Bu yaxınlarda xaricdə iki ölkənin dövlət başçısı ilə görüşüm oldu. Onlar müdrik dahi rəhbər kimi Sizin haqqınızda ağızdolusu danışanda yerə-göyə sığmırdım. Azərbaycanın tolerantlığı haqqında konfranslarda misal gətirirlər. Bu, məni çox sevindirir. Əlbəttə, bunun səbəbkarı Sizsiniz.
Mən bu yaxınlarda İordaniyada dostum, Misirin müftisi Tantani ilə görüşdüm. O, mənə Sizinlə görüşünü xatırlatdı. Dedi ki, sizin Prezidentlə görüşdüm, o, mənə Azərbaycan haqqında çox danışdı. Mən Azərbaycanı görmək istəyirəm. O, həm də mənə dedi ki, özüm üçün iqamətgah tikmirəm, amma şeyxülislam üçün iqamətgah tikirəm. Mən buna çox sevindim. Sevinirəm ki, mənəviyyatımıza Siz bu şəkildə qiymət verirsiniz.
Əlbəttə, bu gün Azərbaycanın bu dirçəlişini, yüksəlişini, firavanlığı gözü götürməyən bəzi insanlar, qüvvələr də var. Bu qüvvələrin əsas dayaqları xaricdədir. Bunu biz bilirik. Bəzən daxildə də səslərini çıxarmaq istəyirlər. Ancaq inanın ki, onların heç bir qüvvəsi yoxdur. Onların arxasında Allah dayanmır, həqiqət dayanmır. Həqiqət Sizinlədir.
Mən istərdim bu yerdə Qurandan bir ayə gətirim. Qurani-Şərifdə buyrulur ki, insanlar bəzən Allah-Təalanın çırağını, nurunu, günəşini başa düşmədən, üfürməklə söndürmək istəyirlər. O çırağı ki, mən yandırmışam, onu sən heç vaxt söndürə bilməzsən. Mən inanıram ki, Heydər Əliyevin nurunu Allah-Təala yazdı və bu çıraq inşallah, hələ yanmaqda davam edəcəkdir. O çıraq yanacaq, mən buna inanıram. Biz dindarlar buna inanırıq, bunun üçün dua edirik. Bu gün bəzi insanlar, bəzi qüvvələr əgər varsa da, onlar heç vaxt bizi doğru yoldan döndərə bilməyəcəkdir. Dindarlarımız həmişə Sizinlədir və həmişə Sizinlə olacaqlar.
Sizin Azərbaycan üçün gördüyünüz işlər böyükdür. Bu gün Azərbaycana xaricdən, daxildən baxanda tikintilər, körpülər, məktəblər, mədəniyyət ocaqları görünür. Bundan başqa, Sizin mənəviyyata verdiyiniz çox böyük qiymət və göstərdiyiniz kömək nəticəsində Bakıda həm kilsə tikilib, sinaqoq tikilib, katolik kilsəsi tikilib, həm də məscidlər təmir olunur. Təzəpir məscidi bizim Azərbaycan xalqının dini mərkəzidir. Biz onun günbəzinin qızıldan olmasını birinci dəfədir görürük. Bizim həyatımızda belə bir şey olmamışdır, görməmişik. Sizin istəyinizlə, maddi-mənəvi köməyinizlə həm Bibiheybət, həm də İçərişəhər tamamilə yenidən qurulur. Azərbaycanda tolerantlıq rəmzi kimi Hacı Əjdər məscidində iki məzhəbdən olan insanlar namaz qılırlar. İndi orada çox böyük təmir işləri gedir. Təkcə Bakıda deyil, Azərbaycanın çox yerlərində mənəvi ocaqlar yüksəlir. Həmişə əllərimiz göydə Sizdən ötrü Allaha dua edirik. Əlbəttə, biz inanırıq ki, gələcək həqiqətlədir, haqladır və haqq da Sizinlədir.
Siz vədinizə əməl etdiniz. Siz söz vermişdiniz ki, gələcəyəm və gəldiniz də. Mən Sizə bu dostluğa, bu münasibətə görə əhali adından, öz adımdan, bütün müsəlmanlar adından minnətdarlığımı bildirirəm. Arzu edirəm ki, Sizi gələn il yenidən Prezident görək. Gələn il seçkilər dövrüdür və bayram o dövrə düşür. İnşallah, həmin vaxtda Sizi yenə Prezident kimi dəvət edəcəyəm və istərdim burada iştirak edəsiniz.
X X X
Sonra şeyxülislam Ramazan bayramı münasibətilə Azərbaycan xalqına və dövlətimizin başçısına ən xoş arzularını yetirdi.
Bölmənin digər xəbərləri
