Qoy haqqın uğrunda canımız olsun fəda,
Hamı bilsin, Qarabağ Azərbaycandır, nida!
Naxçıvan, 6 oktyabr, AZƏRTAC
Müstəqillik tariximizdə son günlərdə yaşadığımız zəfər sevincləri kimi xoş anlarımızın şahidi olaraq özümü hədsiz dərəcə şanslı bir vətəndaş olaraq görürəm. Uzun illərdir həsrətini çəkdiyimiz Qarabağ torpaqlarının düşmən işğalından anbaan təmizlənməsi, azad edilməsi hər bir Azərbaycan vətəndaşının öz ürəyində yaşatdığı arzusu idi. Allaha şükürlər olsun ki, bu günlərdə həmin arzumuzu reallaşdığını həyəcanla izləyir, cəbhəboyu aparılan uğurlu hərbi əməliyyatların müjdələri ilə ifadəsi mümkün olmayan hisslər yaşayırıq.
Bu sözləri AZƏRTAC-ın Naxçıvan bürosuna müsahibəsində AMEA Naxçıvan Bölməsi, İncəsənət, Dil və Ədəbiyyat İnstitutunun Folklorşünaslıq şöbəsinin müdiri, filologiya üzrə fəlsəfə doktoru, dosent, şair-publisist Elxan Yurdoğlu deyib. O bildirib ki, Prezident İlham Əliyevin qətiyyətli qərarları xalq-dövlət birliyinin ən gözəl ifadəsi kimi sinəmizi qabardır, könlümüzü oxşayır, hər birimizi Vətən yolunda son damla qanımıza kimi savaşmağa kökləyir. Qarabağın kəndbəkənd, zirvəbəzirvə geri qaytarılması hər kəsin ürəyincədir, hər kəsi həyat dolu inama kökləyib. İnsanların 30 ilə yaxındır üzərində daşıdığı məğlubiyyət hissi tamamilə sındırılıb və bu gün uşağından yaşlısına kimi bütün Azərbaycan xalqı qanı, canı, ruhu - bütün varlığı ilə döyüşə getməyə hazırdır.
Elxan Yurdoğlu vurğulayıb ki, qismən səfərbərlik qərarından sonra gənclərimizin əldə silah düşmənlə mübarizəyə atılma istəklərini görmək nəyə desən dəyər. Xüsusilə Vətən oğulları ilə birlikdə ana-bacılarımızın da bu yolda hazır olduğuqlarını nümayiş etdirmələri xalq olaraq birliyimizin ən bariz göstəricisidir. Hələ illər əvvəl bir şeirimdə yazmışdım ki,
Azərbaycan, hər qarışın Vətənsə,
Vətən mənəm, Vətən odur, Vətən sən.
Dünyanı lərzəyə salaq Vətəndən
Dünyanı lərzəyə salsın bu birlik,
Bu gün yox, hər zaman birləşməliyik.
Vətən hamı üçün başlar sərhəddən,
Bizim varlığımız başlar bu həddən.
Hərəmiz bir yandan - şəhərdən, kənddən
Birləşib bir olan - yüzük, yüz minik,
Bu gün yox, hər zaman birləşməliyik.
“Bax, bu günlərdə xalq olaraq hər birimiz həmin birliyin şahidiyik. Ön cəbhədə əsgərindən generalına kimi necə yumruq kimi birləşiblərsə, arxa cəbhədə də şəhid analarıyla gənc analar, şəhid atalarıyla gənc atalar, müəllim və tələbələr, müdir və işçilər, fəhlə və ziyalılar, qadın və kişilər o şəkildə birləşiblər, həmrəydirlər, yekdildirlər, birqəlbdirlər”, - deyən şöbə müdiri bildirib ki, xalqımızın tarixi torpaqlarımız uğrundakı haqq savaşında canını Vətən yolunda fəda edən şəhidlərimiz də olacaq. O şəhidlər ki, ən uca haqq zirvəsini, ən uca mənəviyyat zirvəsini, ən əsası isə xalqın qəlbində əbədi yaşama haqqını qazanırlar. Buna baxmayaraq, şəhidlərimiz öz əsgər yoldaşlarına yaxınlaşan zəfər günləri üçün yol açır, istiqamət verir, güc bağışlayır.
Elxan Yurdoğlu deyib: “Haydı, Azərbaycan əsgəri, alimi, şairi, müəllimi, jurnalisti, fəhləsi, ustası, uşağı, böyüyü ilə Azərbaycan xalqı, türk dünyası sənin gücünə arxalanır, səni öz duaları ilə qələbəyə kökləyir. Bu sözləri deyərkən ruhumun özünə yer tapmadığını, bədənimin gizildədiyini, qanımın qaynadığını, yumruğumun sıxıldığını, biləyimin möhkəmləndiyini hiss edirəm. Təkcə mənmi? Xeyr! Hər birimiz, hər bir azərbaycanlı bu gün belədir. Çünki biz haqq savaşındayıq, biz haqqımız uğurunda mübarizədəyik və biz haqqımızı alacağımıza əminik. Ey səngərdəki əsgər qardaşım, general komandirim, bilin ki, hələ minlərlə, milyonlarla əsgərin əmrə müntəzirdir və bir çağırışla sizin səflərinizdə olacaq, sıralarınızda dayanacaq. Çünki,
Bu namus savaşıdır, bu torpaq savaşıdır,
Qarabağçün darıxan bir bayraq savaşıdır,
Bu, haqqını istəyən xalqın haqq savaşıdır,
Qoy haqqın uğrunda canımız olsun fəda,
Hamı bilsin, Qarabağ Azərbaycandır, nida!”.
Bölmənin digər xəbərləri
