Şahin Diniyev: Futbolçularımızın ən böyük problemi ölkə xaricində cəmiyyətə tez uyğunlaşa bilməmələridir
Bakı, 14 may, AZƏRTAC
Ölkə xaricində legioner həyatı yaşamaq çətin prosesdir.
Bu sözləri AZƏRTAC-a açıqlamasında veteran futbolçu Şahin Diniyev azərbaycanlı futbolçuların ölkə xaricində oynadıqları klublarda uzun müddət qalmamaları barədə danışarkən deyib.
Təcrübəli mütəxəssis bildirib ki, başqa ölkədə karyerasını davam etdirmək istəyən futbolçu əvvəlcə həmin yerin dilini və mədəniyyətini öyrənməlidir: “Bizim futbolçuların ən böyük problemi ölkə xaricində cəmiyyətə tez uyğunlaşa bilməmələridir. Mən də legioner həyatı yaşadığım üçün bunun necə olduğunu bilirəm. Azərbaycanlı futbolçu ölkəsində sıx dostluq və qohumluq əlaqələri görür. Lakin Avropada mentalitet belə deyil. Başqa kluba keçdiyin zaman fərqli dünyaya addım atmış olursan. Orada sənin yaxınların olmur və məcbur fikrini oyununa yönəltməli olursan. Ümumiyyətlə, bu mərhələdə psixologiya önəmlidir”.
Ş.Diniyev səbirli və təmkinli olmağın futbolçularımıza Avropada uğur qazandıracağına inandığını söyləyib: “Futbolçuların əldə edəcəyi nəticələr gələcəkdə uşaqlara yaxşı stimul və örnək olacaq. Çünki qazanılan uğur Azərbaycan futbolunun adına yazılacaq. Dörd-beş il peşəkar səviyyədə özünü tutsan, ölkəndə yaşadıqlarını unutsan və gələcək yaşayışını düşünsən, yüksək səviyyədə oynaya bilərsən. Özünü futbola qurban verməlisən, təkliyə öyrəşməlisən. Ən önəmlisi, oyunçularımız adaptasiya, psixologiya və xarakterləri üzərində çox işləməlidirlər”.
Qeyd edək ki, Şahin Diniyev futbolçu karyerası ərzində Moldova, Rusiya və İsraildə legioner həyatı yaşayıb.
Bölmənin digər xəbərləri
