Şamaxıya turist axını ildən-ilə güclənir
Şamaxı, 1 sentyabr (AZƏRTAC). Füsunkar təbiəti, zəngin keçmişi, tarixi abidələri ilə tanınan qədim Şamaxıya son illər turist axını güclənmişdir.
Rayon mədəniyyət və turizm şöbəsindən AZƏRTAC-a bildirmişlər ki, Prezident İlham Əliyevin ölkəmizdə turizm sənayesinin inkişafı istiqamətində həyata keçirdiyi tədbirlər, turizm potensialı yüksək olan bölgələrə diqqət və qayğı Şamaxı rayonunda da uğurlu nəticələr verməkdədir. Təsadüfi deyildir ki, bölgəyə turist axını ildən-ilə güclənir.
Cari ilin 8 ayında Şamaxıya 57420 nəfər turist gəlmişdir ki, bu da ötən ilin müvafiq dövrü ilə müqayisədə 10 faizədək çoxdur. Rayonun “Gülüstan”, “Qaleyi Bəyqurd” kimi möhtəşəm qalalarına, Kələxana, Yeddi Gümbəz abidələrinə, Cümə məscidinə, Şamaxı Astrofizika Rəsədxanasına böyük maraq bu diyara həm də xarici turistlərin axınını gücləndirmişdir. Cari ilin ötən müddətində bölgəyə 9650 nəfər xarici turist gəlmişdir. Bu, keçən ilin müvafiq dövrü ilə müqayisədə iki dəfə çoxdur.
Rayonda 25 istirahət mərkəzi vardır. “Göy qurşağı”, “Dədə Qorqud”, “Qızıldaş”, “Şirvansaray”, “Dağlar qoynunda” kimi müasir standartlara cavab verən istirahət mərkəzlərində turistlər üçün hər şərait yaradılmışdır.
Bölmənin digər xəbərləri
