Sankt-Peterburqda “Dəniz turizmi” IV Beynəlxalq forumu keçirilmişdir
Bakı, 6 iyul (AZƏRTAC). Sankt-Peterburqda “Yedinaya Rossiya” Partiyasının “Sankt-Peterburq Rusiyanın dəniz paytaxtıdır” layihəsi çərçivəsində Rusiyada su turizminin inkişafına dair tədbirlərin təkmilləşdirilməsinə həsr olunmuş “Dəniz turizmi” IV Beynəlxalq forumu keçirilmişdir.
Tədbir Rusiya Federasiya Şurasının Federal Məclisi (FM), RF FM-nin Dövlət Duması, Rusiyanın Mədəniyyət və Nəqliyyat nazirliklərinin, Turizm, dəniz və çay nəqliyyatı federal agentliklərinin, yerli və beynəlxalq təşkilatların dəstəyi və iştirakı ilə keçirilmişdir.
Tədbirdə Sankt-Peterburq Administrasiyasının, Rusiyanın federal və regional hakimiyyət orqanlarının, habelə müxtəlif xarici və beynəlxalq təşkilatların təmsilçiləri iştirak etmişlər.
Azərbaycan Respublikasının Sankt-Peterburqdakı baş konsulluğunun mətbuat xidmətindən AZƏRTAC-a bildirmişlər ki, forumun işində baş konsul Qüdsi Osmanov “Xəzər dənizində kruiz və yaxta turizminin inkişafı perspektivləri. Beynəlxalq əməkdaşlıq ” mövzusunda məruzə ilə çıxış etmişdir. O, Xəzəryanı ölkələrin uğurlu əməkdaşlığından söz açaraq, Azərbaycanda müasir nəqliyyat infrastrukturunun, o cümlədən dəniz nəqliyyatının inkişafı üçün infrastrukturun tikintisi üzrə həyata keçirilən irimiqyaslı layihələri qeyd etmişdir. Baş konsul Bakıda yeni müasir gəmiqayırma zavodunun və iri ticarət limanının tikintisini də vurğulamışdır.
Bölmənin digər xəbərləri
