Təl-Əviv Universitetində Bakı Musiqi Akademiyasının məzunu Səbinə Quliyevanın solo konserti olmuşdur
Bakı, 27 may (AZƏRTAC). Təl-Əviv Universiteti nəzdində Buxman-Meta adına Ali Musiqi Məktəbinin aspiranturasında Üzeyir Hacıbəyli adına Bakı Musiqi Akademiyasının məzunu, skripkaçı Səbinə Quliyevanın yekun solo konserti olmuşdur. S.Quliyeva iki ildir ki, İsraildə öz ifaçılıq ustalığını təkmilləşdirir.
Səbinə israilli məşhur konsertmeyster Yuliya Qurviçin müşayiəti ilə (yeri gəlmişkən, o da Bakıda doğulub boya-başa çatmışdır) V.A.Motsartın skripka ilə orkestr üçün 5 nömrəli konsertini, israilli bəstəkar Mark Lavrinin “Üç yəhudi rəqsi”, Sezar Frankın skripka və fortepiano üçün “Sonata la major” əsərini virtuoz şəkildə ifa etmişdir. Səbinənin qüsursuz və səmimi ifasında peşəkarlıq hiss olunurdu. Öz ifasını dünya səviyyəsinə çatdırmaq üçün yorulmadan və səylə çalışan azərbaycanlı skripkaçı buna nə dərəcədə nail olduğunu nümayiş etdirmişdir.
Səbinə yerli jurnalistlərlə söhbətində ifaçı skripkaçıların yüksək səviyyəsini, Təl-Əviv Universiteti nəzdində Buxman-Meta adına Ali Musiqi Məktəbinin gözəl pedaqoji heyətini, təlim prosesinin dolğun olmasını qeyd etmişdir.
Xatırladaq ki, Səbinə Quliyeva Bakı Musiqi Akademiyasının magistraturasını bitirəndən sonra altı il Üzeyir Hacıbəyli adına Dövlət Simfonik Orkestrində çalışmış, tədris işində özünü sınamışdır. Lakin Səbinə dünya səviyyəli musiqiçi olmağa çalışır. 2012-ci ilin iyun ayında Təl-Əviv Universiteti nəzdində Buxman-Meta adına Ali Musiqi Məktəbində ixtisas imtahanını uğurla verərək taleyində əsaslı dəyişiklik etməyi qərara almış və İsrail dövlətinə köçüb gəlmişdi. Məqsədi dünya musiqisinin yeni zirvələrini fəth etməkdən ibarət olan Səbinənin ixtisas müəllimi İsrail filarmonik orkestrinin konsertmeysteri, təcrübəli musiqiçi və pedaqoq İlya Konovalovdur.
Səbinə Quliyeva belə hesab edir ki, ixtisas üzrə səmərəli və gərgin məşğələlərlə yanaşı, aspiranturada təhsil proqramına daxil olan bir sıra maraqlı fənlər də interpretasiyaya yeni baxış formalaşdırır. Ali məktəbin direktoru Zeyev Dormanın orkestr sinfi bu işdə xüsusi rol oynayır. Tələbələrin gözəl orkestri dünyanın ən yaxşı orkestrlərinin repertuarının bəzəyi ola biləcək çox mürəkkəb əsərləri ifa edir: Bethovenin doqquzuncu simfoniyası, Bramsın dördüncü simfoniyası, Çaykovskinin beşinci simfoniyası və s.
İsraildəki Azərbaycan diasporunun nümayəndəsi, politoloq Arye Qut demişdir: “Mən əyləşib Səbinə Quliyevanın ifasını dinlədikcə daxilən qürur hissi keçirirdim: İsrail-Azərbaycan tərəfdaşlığı yüksək siyasi və iqtisadi göstəricilərlə yanaşı mədəniyyət sahəsində də böyük uğurlar qazanmış, dünya musiqisinin nailiyyətlərindən bəhrələnmişdir. Mənim fikrimcə, zalda əyləşən peşəkar musiqiçilər və xüsusən İsraildəki Azərbaycan diasporunun nümayəndələri kimi dəstək qrupu həm Azərbaycana, həm də İsrailə görə fəxr edirik. Səbinə xanım dünya musiqisinin əsl balaca brilyantıdır. O bizə çox xoşbəxt dəqiqələr bəxş etmiş, dünya klassik musiqi xəzinəsinin gözəl nümunələri ilə tanış omaq, onları dinləmək imkanı vermişdir”.
Arye Qut AZƏRTAC-a müsahibəsində daha sonra demişdir: “Bu gün Məhəmmədəmin Rəsulzadə, Fətəli xan Xoyski, Əlimərdan bəy Topçubaşov kimi banilərin yaratdığı Azərbaycan Xalq Cümhuriyyətinin yubileyini qeyd etdiyimiz bir vaxtda Təl-Əviv universitetində Səbinə Quliyevanın Virtuoz ifasında dünya klassiklərinin əsərlərini dinləyəndə yəqin edirsən ki, dünyaya Üzeyir Hacıbəyli və Qara Qarayev, Niyazi və Fikrət Əmirov, Asəf Zeynallı və Müslüm Maqomayev kimi görkəmli bəstəkarlar bəxş etmiş xalq bu ənənələri ləyaqətlə davam etdirir və bütün çətinliklərə baxmayaraq bu xalq məğlubedilməzdir. Bu gün Səbinənin ifasını dinlədikcə anlayırsan ki, yüksək peşəkarlığa və orijinal üsluba malik olan Azərbaycan musiqiçiləri xalq musiqisini ümumi peşəkar musiqi mədəniyyəti sistemi ilə əlaqələndirməyə nail olmuşlar. Azərbaycanı İsraildə qürurla təmsil edən Səbinə Quliyeva bu fikri əyani şəkildə təsdiqləyir. Bu yerdə şairin sözləri yada düşür:
Sən bizimsən, bizimsən,
Durduqca bədəndə can,
Yaşa, yaşa, çox yaşa,
Ey şanlı Azərbaycan!”
Bölmənin digər xəbərləri
