REGİONLAR
TEXNİKİ SERVİSLƏRİN TƏŞKİLİ BÖLGƏLƏRİN SOSİAL- İQTİSADİ İNKİŞAFINDA BAŞLICA ŞƏRTLƏRDƏNDİR
Şamaxı Ərazi Kənd Təsərrüfatı İdarəsində aqrar bölmədə olan dövlət qurumları rəhbərlərinin, fermerlərin və özəl torpaq sahiblərinin iştirakı ilə keçirilən geniş yığıncaqda Fərmandan irəli gələn vəzifələr müzakirə olunmuşdur.
Respublika Kənd Təsərrüfatı Nazirliyinin şöbə müdiri Mehman Məmmədov, Şamaxı Ərazi Kənd Təsərrüfatı İdarəsinin rəisi Nadir Qədirov, “Qələbə” qoyunçuluq dövlət damazlıq müəssisəsinin direktoru Vəli Hidayətov, Şamaxı rayon bitki mühafizə stansiyasının rəisi Məzahir Muradov, aqrokimya laboratoriyasının müdiri Əlimusa Mirzəyev çıxış edərək bölgədə təsərrüfatın ayrı-ayrı sahələrinin inkişafı ilə əlaqədar konkret vəzifələrdən danışmışlar.
Yığıncaqdan sonra Nadir Qədirov AZƏRTAC-ın müxbirinə demişdir ki, yerlərdə texniki servislərin təşkili qarşımızda duran ən ciddi məsələdir. Qısa müddətdə Şamaxı, Qobustan, İsmayıllı, Qəbələ, Abşeron və Ağsu rayonlarında 30-dan çox texniki servis yaradılmışdır. Bu iş davam etdirilir. Bu gün kəndə kömək diqqət mərkəzində olmalıdır. Məsələn, təkcə pambıqçılıq üçün 6 rayona onlarla traktor və becərmə aqreqatı lazımdır. Nəinki texnikanın, habelə gübrələrin və dərman preparatlarının mərkəzləşdirilmiş qaydada təminatı da vacib şərtdir. Hər bir fermer, eləcə də torpaq sahibi bilməlidir ki, ona lazım olan texnikanı, gübrə və dərman preparatını istədiyi vaxt yaxınlıqda tapa biləcəkdir. Özü də əlverişli, güzəştli şərtlərlə.