Tramp və Netanyahunun görüşündən sonra əhəmiyyətli bəyanatlar gözlənilir
Bakı, 29 sentyabr, AZƏRTAC
ABŞ Prezidenti Donald Trampın İsrailin Baş naziri Binyamin Netanyahu ilə görüşündən sonra birgə mətbuat konfransının keçiriləcəyi gözlənilir.
AZƏRTAC xəbər verir ki, “The Times of Israel” qəzetinin məlumatına görə, görüş nəticəsində Qəzza sektorunda sülh sazişinə dair razılığın əldə olunacağı ilə bağlı açıqlamaların veriləcəyi istisna olunmur. Nəşr yazır ki, ABŞ artıq müharibədən sonrakı dövrdə Qəzzanın idarə olunması ilə bağlı ərəb və müsəlman dövlətlərinin ilkin dəstəyini əldə edib. ABŞ-ın xüsusi nümayəndəsi Stiv Uitkoff sentyabrın 28-də İsrailin Baş naziri ilə ikisaatlıq görüş keçirib. Lakin Binyamin Netanyahu hələlik yekun qərarın qəbul edilmədiyini və Ağ evlə bu plan üzərində işlədiklərini bildirib. Görüşdə Trampın kürəkəni və müşaviri Cared Kuşner də iştirak edib.
Eyni zamanda, HƏMAS hərəkatının nümayəndələri ABŞ-ın təklif etdiyi planla tanış olmadıqlarını bəyan ediblər. “The Times of Israel” yazır ki, HƏMAS-ın razılığı olmadan bu planın reallaşdırılması çətin olacaq.
Ekspertlərin sözlərinə görə, Netanyahu ABŞ planına müəyyən dəyişikliklər etsə, bu, ərəb və müsəlman ölkələrinin dəstəyini risk altına qoya bilər. Belə ki, həmin dövlətlər Fələstin Muxtariyyətinin Qəzzada əsas rol oynamasını və gələcəkdə Fələstin dövlətinin yaradılması yolunun açıq qalmasını vacib şərt kimi irəli sürürlər. Bunlar isə Netanyahunun açıq şəkildə qarşı çıxdığı iki əsas məsələdir.
Bölmənin digər xəbərləri
