Türkiyə Azərbaycan Dərnəkləri Federasiyasının III qurultayı keçirilmişdir
Bakı, 24 noyabr (AZƏRTAC). Noyabrın 24-də Türkiyənin İzmit şəhərində Türkiyə Azərbaycan Dərnəkləri Federasiyasının (TADF) III Qurultayı keçirilmişdir.
Diasporla İş üzrə Dövlət Komitəsindən AZƏRTAC-a bildirmişlər ki, Azərbaycanın və Türkiyənin dövlət himnləri səsləndirildikdən sonra qurultayın Rəyasət Heyəti seçilmiş və TADF-in sədri Bilal Dündarın hesabat məruzəsi dinlənilmişdir. Təşkilatın ötən müddət ərzində gördüyü işlər haqqında ətraflı məlumat verən B.Dündar həyata keçirilmiş layihələrin Azərbaycan-Türkiyə əlaqələrinin daha da inkişafına xidmət etdiyini bildirmişdir. Qeyd etmişdir ki, təşkilatın fəaliyyətini daha da gücləndirmək üçün hüquqşünasların və peşəkar mütəxəssislərin quruma cəlb olunması planlaşdırılır.
B.Dündar TADF-in Türkiyənin dövlət orqanları, kütləvi informasiya vasitələri, siyasi partiyaları, qeyri-hökumət təşkilatları ilə yaxşı əlaqələrə malik olduğunu, gələcəkdə bu əlaqələrin daha da dərinləşdiriləcəyini qeyd etmişdir. O, Balıkəsr Bələdiyyə Məclisinin Xocalı faciəsini soyqırımı kimi tanıyan qərar qəbul etdiyini diqqətə çatdırmışdır.
Hesabat məruzəsindən sonra Federasiyanın ötən dövrdəki fəaliyyətini əks etdirən filmin nümayişi olmuşdur.
Nəzarət-təftiş komissiyasının hesabatı dinlənildikdən sonra qurultay nümayəndələrinin təklifləri əsasında nizamnaməyə bəzi dəyişiklik və əlavələr edilmişdir. İdarə heyəti üzvlərinin say tərkibi 9-dan 7-yə, nəzarət-təftiş komissiyasının tərkibi isə 7-dən 5-ə endirilmişdir. Bu dəyişikliyin məqsədi təşkilatın daha operativ idarə edilməsinə nail olmaqdır. Daha bir təklif isə təşkilatın idarə heyətinə seçkilərdə namizədliklərin siyahı əsasında deyil, tək-tək irəli sürülməsi ilə bağlı olmuşdur. Təklif qəbul edilmişdir. Qurultay nümayəndələri, həmçinin Federasiyanın tərkibində ictimai xadimlərin təmsil olunduğu Məsləhət Şurasının yaradılması üçün idarə heyətinə səlahiyyət verilməsi barədə təklifin də lehinə səs vermişlər. Daha sonra idarə heyəti və nəzarət-təftiş komissiyasının tərkibi seçilmişdir.
Qurultayda TADF-in gələcək fəaliyyəti ilə bağlı təkliflər yeni seçilən idarə heyətinin diqqətinə çatdırılmışdır. Qurultayda TADF-in mətbu orqanının yaradılması, internet səhifəsinin təkmilləşdirilməsi, üzv təşkilatların fəaliyyətinin daha yaxşı əlaqələndirilməsi üçün tədbirlərin görülməsi və digər məsələlərlə bağlı qərarlar da qəbul olunmuşdur.
Diasporla İş üzrə Dövlət Komitəsi aparatının rəhbəri Nəriman Qurbanov qurultayda çıxış edərək TADF-in keçdiyi tarixi yol haqqında danışaraq, qurumun bir sıra uğurlara imza atdığını bildirmişdir. O, təşkilatın gələcək fəaliyyətində qloballaşan dünyanın reallıqlarını nəzərə alan strategiyanın seçilməsinə ehtiyac duyulduğunu qeyd etmişdir. N.Qurbanov diasporun ictimai-siyasi fəallığının daha da artırılmasının, fəaliyyət göstərdiyi ölkələrin dövlət qurumları, kütləvi informasiya vasitələri, siyasi partiyaları ilə sıx əlaqələrinin qurulmasının, ziyalıların diaspor quruculuğu işinə daha fəal cəlb olunmasının zəruriliyini vurğulamışdır.
Toplantının sonunda qurultay iştirakçılarının Azərbaycan Prezidenti İlham Əliyevə və Türkiyə Prezidenti Abdullah Gülə müraciəti qəbul edilmişdir.
Türkiyə Azərbaycan Dərnəkləri Federasiyası 2006-cı ildə yaradılmışdır. 2008-ci ildə təşkilatın I qurultayı, 2010-cu ildə II qurultayı keçirilmişdir. Təşkilatın tərkibində Türkiyədə fəaliyyət göstərən Azərbaycan dərnəkləri təmsil olunur.
Bölmənin digər xəbərləri
