Türkiyəli jurnalistlər Heydər Əliyev Mərkəzi ilə tanış olublar
Bakı, 4 aprel, S.Allahverdiyeva, AZƏRTAC
Türkiyənin bir qrup tanınmış media nümayəndəsi aprelin 4-də Heydər Əliyev Mərkəzində olub.
AZƏRTAC xəbər verir ki, qonaqlara ulu öndər Heydər Əliyevin dövlətçilik fəlsəfəsinin, azərbaycançılıq ideologiyasının və zəngin irsinin dərindən öyrənilməsinə və tədqiq edilməsinə yönəlmiş Mərkəzin binasının dünya memarlıq inciləri sırasında olması barədə məlumat verilib.
Mərkəzdəki Heydər Əliyev Muzeyi ilə tanışlıq türkiyəli jurnalistlərdə böyük maraq yaradıb. Qeyd edilib ki, Muzey təşkil olunarkən burada Ümummilli Liderin həyat və fəaliyyətinin müxtəlif dövrlərinin əks olunmasına xüsusi diqqət yetirilib. Bu muzey həm də Heydər Əliyev irsinin öyrənilməsi baxımından xüsusi önəmə malikdir. Muzeylə tanışlıq zamanı türkiyəli media təmsilçiləri 1969-cu ildən 2003-cü ilədək ulu öndər Heydər Əliyevin Azərbaycana rəhbərlik etdiyi dövrlərdə xidməti istifadəsində olan avtomobillərə baxıblar.
“Azərbaycan inciləri: tarixin axarında” sərgisi ilə tanış olan qonaqların diqqətinə çatdırılıb ki, bu sərgidə Azərbaycan tarixini və mədəniyyətini əks etdirən, ölkəmizin tükənməz təbii sərvətləri, çoxəsrlik tarixi, mədəni irsinə dair nadir eksponatlar nümayiş olunur.
Daha sonra nümayəndə heyətinə Mərkəzdə sərgilənən “Klassik avtomobil sərgisi” barədə məlumat verilib.
Türkiyəli jurnalistlər Mərkəzlə tanışlığın onlarda zəngin təəssürat yaratdığını bildiriblər.
Qonaqlara xatirə olaraq Heydər Əliyev Mərkəzi haqqında kitab təqdim edilib.
Bölmənin digər xəbərləri
