Türkiyəli nazir: İslamabad sülh, sabitlik və təhlükəsizliyə mühüm töhfə verir
Ankara, 5 aprel, AZƏRTAC
Türkiyənin milli müdafiə naziri Yaşar Güler ölkəsinin Pakistanla tam həmrəy olduğunu bəyan edib.
AZƏRTAC xəbər verir ki, Pakistanın Ankaradakı səfirliyində çıxış edən türkiyəli nazir onu qardaş ölkə adlandırıb və bütün zamanlarda Türkiyəni dəstəklədiyini bildirib.
Yaşar Güler vurğulayıb: “Ankara hesab edir ki, Pakistan beynəlxalq arenada onun ən etibarlı tərəfdaşlarından biridir. Ölkələrimiz ən çətin dövrlərdə bir-birinə hərtərəfli dəstək göstərib. Bu münasibətlər möhkəm əsasları olan dostluq və qardaşlıq bağları üzərində qurulub”.
Nazirin sözlərinə görə, beynəlxalq arenada mühüm aktor olan müasir Pakistan dövlətinin həm regional, həm də qlobal miqyasda strateji əhəmiyyəti hamı tərəfindən qəbul edilir. O vurğulayıb: “İslamabad qlobal sülh, sabitlik və təhlükəsizlik gündəliyinin formalaşmasında mühüm rola malikdir”.
Türkiyənin milli müdafiə naziri vurğulayıb ki, Ankarada dost İslamabadın hər bir uğuruna və onun nüfuzunun artmasına sevinirlər. O əmin edib: “Pakistan gələcəkdə də Türkiyə vətəndaşlarının qəlblərində xüsusi yer tutacaq”.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
