SİYASƏT
Ukrayna Azərbaycanlıları Konqresi həmvətənləri dəstəklədiyinə görə “Azərbaycan Hava Yolları”nın xidmətlərini yüksək qiymətləndirir
Bakı, 5 noyabr (AZƏRTAC). “Azərbaycan Hava Yolları”nın Ukraynadakı nümayəndəsi Yaşar Əmirov və Azərbaycan Dövlət Teleqraf Agentliyinin - AZƏRTAC-ın xüsusi müxbiri Zeynal Ağazadə Ukrayna Azərbaycanlıları Konqresinin (UAK) Kiyev şəhər təşkilatının Fəxri fərmanlarına layiq görülmüşlər.
Onlar uzun illər namuslu çalışdıqlarına, yüksək peşəkarlıqlarına və Ukrayna paytaxtında yaşayan azərbaycanlılara yardım göstərdiklərinə görə mükafatlandırılmışlar.
UAK-ın Kiyev Şəhər Təşkilatının sədri, Heydər Əliyev adına Ukrayna-Azərbaycan Təhsil, Elm, Mədəniyyət və İdman Mərkəzinin təsisçisi, “Azərbaycançılıq İnstitutu” Beynəlxalq İctimai Təşkilatının prezidenti, Azərbaycanın və keçmiş SSRİ-nin sərbəst güləş üzrə Əməkdar İdman Ustası və Əməkdar Məşqçisi Oleq Krapivin Fəxri fərmanları təntənəli şəkildə təqdim etmişdir.