UKRAYNADAKI AZƏRBAYCANLI GƏNCLƏRİN FORUMU KEÇİRİLƏCƏKDİR
AZƏRTAC xəbər verir ki, bu ilin dekabrında Ukraynada yaşayan azərbaycanlı gənclərin birinci forumu keçiriləcəkdir. Ukrayna Azərbaycanlıları Konqresi sədrinin müavini Rasim Novruzov demişdir ki, tədbirdən məqsəd Ukraynada yaşayan, fəaliyyət göstərən və təhsil alan azərbaycanlı gəncləri bir araya gətirmək, onların siyasi fəaliyyətlə məşğul olmasına imkan yaratmaq, indiki diaspor və lobbiçilik fəaliyyətinin gələcək davamçılarını müəyyən etməkdir. Forumda, həmçinin gənclərimizin məişət qayğılarına da toxunulacaq, milli adət-ənənələrimizin, mədəniyyətimizin təbliği, qorunub saxlanması və inkişaf etdirilməsi məsələləri də müzakirə olunacaqdır. Hazırda forumun təşkilinə yardım və Azərbaycanın dövlət orqanları nümayəndələrinin tədbirdə iştirakının təmin olunması ilə bağlı Xarici Ölkələrdə Yaşayan Azərbaycanlılarla İş üzrə Dövlət Komitəsində məsləhətləşmələr aparılır.
Tədbirdə Ukraynadakı milli azlıqların nümayəndələri ilə yanaşı, digər xarici ölkələrdə yaşayan Azərbaycan diaspor təşkilatlarının nümayəndələri də iştirak edəcəklər.
Bölmənin digər xəbərləri
