Ukraynanın Nikolayev vilayətində Azərbaycan əsgərlərinin xatirəsi əbədiləşdiriləcəkdir
Bakı, 19 dekabr (AZƏRTAC). Ukraynanın Nikolayev vilayətində azərbaycanlılardan ibarət 416-cı Taqanroq diviziyası döyüşçülərinin xatirəsi əbədiləşdiriləcəkdir.
AZƏRTAC xəbər verir ki, bu barədə Krımın Azərbaycan icmasının başçısı Rəhim Hümbətov məlumat vermişdir.
O qeyd etmişdir ki, bu yaxınlarda Nikolayev vilayətinin Bessarabka kəndində Azərbaycan döyüşçülərinin şərəfinə xatirə lövhəsinin açılışı mərasimi olmuşdur. Məhz bu yerdə 9 may - Qələbə Günü azərbaycanlılardan ibarət 416-cı Taqanroq atıcı diviziyasının döyüşçüləri və 182-ci qırıcı aviasiya alayının təyyarəçiləri tərəfindən torpaqların azad edilməsi şərəfinə ucaldılmış memorial Şöhrət kompleksinin və “1944-cü il 26 mart-14 aprel Odessa hücum əməliyyatının” muzey-panoramasının tikintisi başa çatdırılacaqdır.
Xatirə lövhəsinin açılışında Nikolayev vilayətinin rəsmi şəxsləri, veteran təşkilatlarının, ictimaiyyətin, Azərbaycan diasporunun nümayəndələri iştirak etmişlər.
Bölmənin digər xəbərləri
