Ümumrusiya Azərbaycanlılar Konqresinin Murmansk bölməsi Respublika Gününə həsr edilmiş tədbir keçirmişdir
Bakı, 29 may (AZƏRTAC). Azərbaycanın dövlət bayramı 28 May - Respublika Günü münasibətilə Ümumrusiya Azərbaycanlılar Konqresinin (ÜAK) Murmansk bölməsi Rusiyanın Azərbaycanlı Gənclər Birliyi (RAGB) ilə birlikdə tədbir keçirmişdir.
Tədbirdə Rusiya Federasiyasının bu regionunda yaşayan həmvətənlərimiz və ictimaiyyətin nümayəndələri - Murmansk vilayət İctimai Palatasının üzvləri, ictimai təşkilatların rəhbərləri, sahibkarlar, ictimai xadimlər və jurnalistlər iştirak etmişlər. Bu barədə AZƏRTAC-a Ümumrusiya Azərbaycanlılar Konqresinin (ÜAK) Murmansk vilayət bölməsinin və Rusiyanın Azərbaycanlı Gənclər Birliyinin (RAGB) mətbuat katibi Əlihüseyn Şükürov məlumat vermişdir.
Rusiya Federasiyası Murmansk vilayət İctimai Palatasının üzvü, ÜAK-ın Murmansk bölməsinin sədri Afil Hüseynov demişdir ki, bu gün Azərbaycan xalqı öz dövlətinin tarixində əlamətdar hadisələrdən birini - Respublika Gününü qeyd edir.
Həmin gün - 1918-ci il mayın 28-də bütün müsəlman Şərqində ilk dəfə Demokratik Respublika yaradılmışdır. Ona görə bu hadisə Azərbaycan tarixinin ən parlaq səhifəsidir.
1918-ci il mayın 28-də axşam Milli Şura Azərbaycanın müstəqilliyini elan etmişdir. Müvafiq rəsmi sənəd tarixə “İstiqlal bəyannaməsi” adı ilə daxil olmuşdur. Sənəddə göstərilirdi ki, müstəqil Azərbaycan dövləti cümhuriyyət olacaqdır. Bu o demək idi ki, Azərbaycan Xalq Cümhuriyyətini (AXC) Azərbaycan xalqı tərəfindən seçilmiş insanlar idarə edəcəklər.
1918-ci il dekabrın 7-də 120 deputatdan ibarət Azərbaycan Parlamentinin birinci iclası təntənəli şəraitdə açılmışdır. M.Ə.Rəsulzadə Parlamentin ilk iclasını açmış və üçrəngli bayrağı göstərərək demişdir: “Bir dəfə yüksələn bayraq bir daha enməz!”
Bu bayraq mavi, qırmızı və yaşıl rəngli bərabər ölçülü üç zolaqdan ibarət idi. Azərbaycan bayrağının simvolikasında Azərbaycan milli azadlıq hərəkatının ideya baxımından təkamülü, onun mənəvi ənənələrə və yeni tarixi dəyərlərə sadiqliyi öz əksini tapmışdır.
AXC parlamenti xalqın xeyrinə çox gərəkli sənədlər: Azərbaycan vətəndaşlığı haqqında, mətbuat haqqında, təhsil haqqında qanunlar qəbul etmişdir. AXC-nin dövründə - 1919-cu ildə Bakı Dövlət Universiteti də yaradılmış, Milli Müstəqillik muzeyi açılmışdır. AXC-nin öz ordusu və himni vardı.
Lakin bolşeviklər bütün bunlarla barışa bilmirdilər. 1920-ci il aprelin 27-dən 28-nə keçən gecə XI Qırmızı Ordu hissələri burada sovet hakimiyyəti qurmaq üçün Azərbaycan Respublikasının sərhədlərini keçdilər. AXC Parlamenti dinc əhalinin qanının tökülməsinə yol verməmək üçün hakimiyyəti təhvil verməyi qərara aldı.
Xalq Cümhuriyyətinin yaradılması və onun fəaliyyəti ilk dəfə olaraq Azərbaycanın müstəqilliyini, azadlıqsevər Azərbaycan xalqının ümidlərinin həyata keçirilməsini, bu xalqın öz dövlətçiliyinə sadiq olmasını bütün dünyaya nümayiş etdirdi. AXC rəhbərləri Azərbaycan xalqının tarixi-mədəni ənənələrinə əsaslanaraq bu hərəkatın ideologiyası kimi azərbaycançılıq təlimini yaratdılar. O, cəmiyyətin rasional quruluşu haqqında Şərq ideyalarını və Qərbin mədəni-demokratik dəyərlərini ehtiva edir.
Sonra RAGB-nin Murmansk nümayəndəliyinin sədri Vüsal İbrahimov, ÜAK-ın və RAGB-nin fəalları çıxış etmişlər.
Qeyd etmək lazımdır ki, tədbir çərçivəsində Azərbaycan Xalq Cümhuriyyətinin yaradılması tarixindən bəhs edən fotosərgi nümayiş etdirilmişdir.
Tədbirin iştirakçılarına və qonaqlara Heydər Əliyev Fondunun nəşrləri, AZƏRTAC-ın saytından materiallar, Azərbaycan KİV-lərinin nüsxələri hədiyyə edilmişdir.
Bölmənin digər xəbərləri
