VATİKANIN AZƏRBAYCANDAKI APOSTOL NUNSİSİ KLAUDİO QUCEROTTİNİN TƏBRİKİ
- Cənab Prezident,
Şeyxülislam həzrətləri,
Yepiskop Aleksandr həzrətləri,
Azərbaycan dağ yəhudilərinin dini icmasının idarə heyətinin sədri,
Hörmətli dövlət hakimiyyəti və din nümayəndələri,
Hörmətli səfirlər!
Mən çox böyük sevinclə sizə Romadan, - məhz bu günlərdə orada Müqəddəs ata XVI Benediktlə görüşürəm, - müsəlman qardaşlar və bütün Azərbaycan xalqı üçün mühüm olan bu təntənəli hadisənin bütün iştirakçılarına ən xoş arzularımı və qardaşlıq salamımı göndərirəm.
Müqəddəs Ramazan ayı bizə bir daha xatırlatdı ki, hər bir insan, biz hamımız Allahın bəndələriyik və zaman, bizim şəxsi imkanlarımız, hətta bizim bədənimizin ən təbii və əhəmiyyətli təzahürləri də yalnız Ona tabedir.
Roma Papası adından sizin hamınızı təbrik etmək və Azərbaycana Allahın xeyir-duasını, tərəqqi, ədalət və sülh arzularımı bildirmək istəyirəm. Biz unutmuruq ki, burada mövcud olan bütün instansiyalarla əməkdaşlıq sayəsində bu il Azərbaycanda ilk katolik kilsəsinin tikintisi ilə bağlı işlər uğurla başa çatdırılmışdır. Bu, sizin ölkənizin hüdudlarından kənarda ümumi əhəmiyyət kəsb edən simvol və nümunədir.
Bu günlərdə bir neçə televiziya reportajının köməyi ilə biz dinlərin xalqları azadlıq uğrunda mübarizəyə necə apara bilmələrinin şahidi olduq. Mömin bəndələr öz hüquqlarını tələb edir və öz duaları ilə silahın qarşısında dayanırdı. Bu, dini real həyatdan qaçmaq, zorakılığa və dözülməzliyə meyil etməyi isə dinə xas olan xüsusiyyətlər hesab edənlərə ən aydın cavabdır.
Azərbaycanda müxtəlif dinlər arasında olan qardaşlıq və qarşılıqlı hörmət münasibətləri, habelə ölkə hökumətinin yeritdiyi tolerantlıq siyasəti Qafqazda - iki qitənin qovuşduğu məkanda yerləşən, buna görə də müxtəlif xalqları və ölkələri əhatə edən, tərəqqiyə və cəmiyyətin dinc inkişafına təhlükə yaradan iğtişaşlara çox həssas olan bu regionda sülhün bərqərar ediləcəyinə qəti ümid yaradır.
Mən inanıram ki, biz hamımız, müxtəlif dinlərin nümayəndələri ümumi firavanlığa öz töhfəsini verməyə çalışan ləyaqətli vətəndaşlar kimi bundan sonra da bir-birimizə hörmət və kömək edəcəyik. Biz hər hansı zorakılıq təhlükəsinin qarşısını yalnız bu yolla ala bilərik. Gəlin unutmayaq ki, tolerantlığın təntənəsi hər bir tərəqqinin mühüm şərtidir.
Qoy, bizim dualarımız Allahdan sülh diləyən çağırış olsun, gəlin inanaq ki, Allah bu çağırışı eşidəcəkdir.
Siyasi hakimiyyət orqanlarını, mədəniyyət və iqtisadiyyat sahələrinin rəhbərlərini dinin səsini eşitməyə çağırırıq. Axı, dinlər insanların rifahının qeydinə qalır, onların ən ülvi istəklərini ifadə edir. Dinlərə saymazyana, şübhə ilə, bəzən də rişxəndlə yanaşmaq - özünü bilərəkdən insan qəlbinin dərinliklərini, bəşəriyyətin bütün tarixinin və bütün sivilizasiyaların mahiyyətini anlamamağa məhkum etməkdir. Buna görə də yalnız varlığın dini ölçülərini nəzərə almağa və onlardan istifadə etməyə çalışan siyasət cəmiyyətin təməl dəyərlərini dərk etməyə qabildir. Əksinə, dini inkar edən siyasət özü-özünə zərər vurur, üstəlik, hadisələrin mahiyyətini dərindən anlamağa qabil olmayan yararsız bir şeyə çevrilir və hətta siyasətin özünün mahiyyətini təşkil edən insan şəxsiyyəti, ayrılıqda götürülmüş hər bir insanın və bütövlükdə bütün insanların rifahı naminə çalışmaq məqsədini də puç edə bilər.
Bu gün bu mühüm məsələlər barədə fikirlərimi bölüşmək imkanına görə müsəlman bacı və qardaşlara təşəkkür edirəm, sizin hamınıza və hər birinizə öz səmimi hisslərimi və dərin ehtiramımı bildirirəm.
X X X
Azərbaycan Prezidenti İlham Əliyev mərasimdə nitq söylədi.
X X X
Şeyxülislam ALLAHŞÜKÜR PAŞAZADƏ:
- Hörmətli Prezident həzrətləri, Siz mənim haqqımda xoş sözlər dediniz. Bayaq dediniz ki, dostluq daimidir, prezidentlik daimi deyil. Amma mən elə bilirəm, prezidentlik də daimidir.
İLHAM ƏLİYEV: Yox, sizin vəzifəniz elədir.
ALLAHŞÜKÜR PAŞAZADƏ: Bizim fikrimizcə, elə hər ikisi daimidir.
Prezident həzrətləri, Allah-Təala Sizdən razı olsun. Çox gözəl tövsiyələr verdiniz və elə bilirəm ki, bizim üçün, biz dindarlar üçün bu bir proqram oldu ki, gələcəkdə işlərimizi o şəkildə quraq.
Bu gün 11 ayın sultanı Ramazan ayı Quranın nazil olduğu aydır. Biz bayaq Heydər Əliyev həzrətlərindən danışdıq, bu gün onun ruhu bizimlədir. Allah Zərifə xanıma da rəhmət eləsin. Onun da zəhməti çox olubdur. Allah-Təala ona da rəhmət eləsin.
İstərdim ki, Qurani-Şərifdən ayələr dinləyək, onların ruhuna dua edək. Mənim ürəyim onda sakit olacaqdır.
X X X
Sonra Quran oxundu, iftar süfrəsi açıldı.
İftar mərasimində xarici dövlətlərin ölkəmizdə akkreditə olunmuş səfirləri, dini icmaların nümayəndələri, Milli Məclisin deputatları iştirak edirdilər.
Bölmənin digər xəbərləri
