Vüqar İskəndərov: “Togg”un istehsalı ilə qardaş ölkənin 60 illik xəyalı gerçəkləşib
Bakı, 5 aprel, AZƏRTAC
Bəlli olduğu kimi, Türkiyə son illərdə bütün sahələrdə mühüm uğurlar əldə edib. Bu uğurların mərkəzində isə Prezident Rəcəb Tayyib Ərdoğanın rəhbərliyi ilə həyata keçirilən siyasət, reallaşdırılan çoxsaylı layihələr dayanır.
Bunu Milli Məclisin deputatı Vüqar İskəndərov AZƏRTAC-a açıqlamasında deyib.
O bildirib ki, 2023-cü il aprelin 16-da Ankarada Türk Dövlətləri Təşkilatının Dövlət Başçılarının Fövqəladə Zirvə görüşündəki çıxışında Prezident İlham Əliyev də bu məqama toxunub: “Türkiyə son 20 ildə Cümhurbaşqanı Rəcəb Tayyib Ərdoğanın liderliyi ilə böyük və şərəfli yol keçmiş, dünyada söz sahibi olmuş, güc mərkəzinə çevrilmişdir. Bu gün dünyada Türkiyə ilə hesablaşırlar və ona hörmət edirlər. Türkiyənin hərbi gücünü, müdafiə sənayesi sahəsində böyük uğurlarını indi dünyada hər kəs görür. Bu illər ərzində Türkiyədə davamlı sabitliyin təmin olunması, ölkənin inkişafı bütün Türk dünyası üçün önəmli şərtdir”.
V.İskəndərovun sözlərinə görə, Türkiyənin imza atdığı daha bir tarixi uğur milli avtomobil istehsalı ilə bağlıdır: “Təbii ki, mən Türkiyənin ilk yerli elektromobili “Togg” markasını nəzərdə tuturam. Məlum olduğu kimi, 2022-ci il oktyabrın 29-da Türkiyənin mobillik sahəsində xidmət göstərən qlobal texnologiya markası “Togg”un kütləvi istehsal zavodunun rəsmi açılış mərasimi keçirilib. Bursa vilayətinin Gemlik rayonunda inşa olunan zavodda montaj mərkəzi, prototip inkişaf, istifadəçi sınaq parkı kimi bir çox bölümlər vardır.
“Togg”un istehsalını Türkiyənin 60 illik xəyalının həyata keçirilməsi kimi qiymətləndirən deputat deyib ki, 2023-cü il martın əvvəlinə olan məlumata görə, “Togg”un T10X modeli üçün ilkin sifariş prosesinə başlanılıb. “Togg T10X” üçün ilk 24 saatda 22 min 150 sifariş qəbul olunub. Azərbaycan-Türkiyə qardaşlığı bu məsələdə də özünü nümayiş etdirib. Belə ki, 2023-cü il aprelin 3-də Prezident Rəcəb Tayyib Ərdoğana və xanımı Əminə Ərdoğana təqdim edilən “Togg” elektromobilinin T10X modeli aprelin 4-də isə Azərbaycan Prezidenti İlham Əliyevə təqdim olunub. Prezident İlham Əliyev Türkiyənin sənaye və texnologiya naziri Mustafa Varankı qəbul edərkən
“Togg” elektromobilinin ikincisinin ölkəmizdə olmasını dostluq və qardaşlıq münasibətlərimizin təzahürü kimi dəyərləndirib.
“Qardaş ölkədə son illərdə həm müdafiə sənayesi, həm də mülki sənaye sahələrində yüksək texnoloji məhsullar istehsal olunur. Prezident İlham Əliyevin də bəyan etdiyi kimi, bu, Türkiyə Prezidenti Rəcəb Tayyib Ərdoğanın liderliyi ilə Türkiyə xalqının zəkası, istedadı və əməyi nəticəsində ərsəyə gəlib. Elə “Togg”un istehsalına başlanması da bu baxımdan yaxşı nümunədir”, - deyə Vüqar İskəndərov vurğulayıb.
Bölmənin digər xəbərləri
