Vyanada Dünya Azərbaycanlılarının Həmrəyliyi Günü münasibətilə tədbir keçirilmişdir
Vyana, 18 dekabr (AZƏRTAC). Azərbaycanın Avstriyadakı səfirliyində Dünya Azərbaycanlılarının Həmrəyliyi Günü və Yeni il münasibətilə tədbir keçirilmişdir. Bayram tədbirində Avstriyada yaşayan soydaşlarımız, burada təhsil alan azərbaycanlı tələbələr və səfirliyin əməkdaşları iştirak etmişlər.
Səfir Qalib İsrafilov qonaqları qarşıdan gələn Dünya Azərbaycanlılarının Həmrəyliyi Günü və Yeni il münasibətilə təbrik etmişdir. Q.İsrafilov dekabrın 31-nin Dünya Azərbaycanlılarının Həmrəyliyi Günü kimi qeyd olunmasının ümummilli lider Heydər Əliyevin adı ilə bağlı olduğunu vurğulamış, bu günün Azərbaycan xalqının tarixindəki əhəmiyyətli yeri barədə məlumat vermişdir. Artıq başa çatmaqda olan 2012-ci ildə Azərbaycanın ictimai-siyasi həyatında baş vermiş mühüm hadisələr, ölkənin artan beynəlxalq nüfuzu, sosial-iqtisadi inkişafın əsas istiqamətlərinə toxunan Q.İsrafilov, həmçinin bildirmişdir ki, bu günlər Avstriyadakı azərbaycanlı icması, xüsusilə tələbələr üçün daha bir əlamətdar hadisənin ildönümünə təsadüf edir. Belə ki, on il bundan əvvəl - 2002-ci ilin sonlarında Avstriyada təhsil alan bir qrup gənc bu ölkədəki ən fəal diaspor təşkilatımız olan Azərbaycan Akademik Birliyinin əsasını qoymuşdur. Səfir soydaşlarımızı Azərbaycan naminə göstərdikləri fəaliyyətdə sıx əməkdaşlığa çağırmış və onlara uğurlar arzulamışdır.
Azərbaycan Akademik Birliyinin sədri Elvin Süleymanov təşkilatın keçdiyi inkişaf yolundan, ölkəmiz haqqında həqiqətlərin təbliğində göstərilən fəaliyyətdən bəhs etmiş, cəmiyyətin fəaliyyətinə göstərilən dəstəyə görə səfirliyə təşəkkür etmişdir.
Azərbaycan milli musiqisi ilə müşayiət olunan tədbirin sonunda qonaqlar səfirlik tərəfindən təşkil edilmiş ziyafətə dəvət olunmuşlar.
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
