XOCALI FACİƏSİ İNSANLIĞA QARŞI GÖRÜNMƏMİŞ SOYQIRIMIDIR
Paris, 26 fevral (AZƏRTAC). Fevralın 25-də Parisin “Prəns de Qall” hotelində Azərbaycanın Fransadakı səfirliyi və ölkəmizin YUNESKO yanında daimi nümayəndəliyi tərəfindən Xocalı faciəsinin 18-ci ildönümü və İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə keçirilən “Xocalıya ədalət” kampaniyasının təqdimatı ilə bağlı mərasim keçirilmişdir.
Fransa ictimaiyyəti nümayəndələrinin, bir çox ölkələrin səfirlərinin, akkreditə olunmuş diplomatik korpusun əməkdaşlarının, Fransanın ölkəmizdəki keçmiş səfirlərinin, YUNESKO yanında nümayəndəliklərin rəhbərlərinin, faciə ilə bağlı Fransada keçirilən tədbirlərdə iştirak etmək üçün Parisə səfər etmiş Azərbaycan nümayəndə heyətinin üzvlərinin, diaspor təmsilçilərinin, bu ölkədə yaşayan azərbaycanlıların və təhsil alan tələbələrimizin, jurnalistlərin iştirak etdiyi mərasimi açan səfir Elçin Əmirbəyov Xocalı faciəsi barədə ətraflı məlumat vermiş, qana susamış erməni hərbçilərinin Azərbaycanın Xocalı şəhərinə soxularaq bir gecənin içərisində dinc əhaliyə amansızlıqla divan tutduqlarını, hətta qadın, uşaq və yaşlı insanlara belə aman vermədiklərini diqqətə çatdırmış, bu etnik təmizləmə praktikasının, azərbaycanlılara qarşı soyqırımı siyasətinin hələ ötən əsrin əvvəllərindən aparıldığını qeyd etmişdir.
Səfir Xocalı faciəsinin insanlığa qarşı görünməmiş soyqırımı olduğunu demiş, faciəyə beynəlxalq təşkilatlar tərəfindən indiyədək hüquqi qiymət verilməməsindən təəssüf hissi keçirdiyini bildirmiş, bütün dünya ictimaiyyətinin Xocalı soyqırımı barədə hərtərəfli məlumat əldə etməsinin vacibliyini vurğulamışdır. Bəşəriyyətə qarşı yönəlmiş bu soyqırımının yaddaşlarda həmişəlik iz saldığını, o dəhşətli gecədən uzun illər keçməsinə baxmayaraq, bu faciə haqqında əsil həqiqətlərin bütün dünyaya çatdırılmasının zəruri olduğunu bildirmişdir. Diplomat İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi və Heydər Əliyev Fondunun Rusiya Federasiyasındakı təmsilçisi Leyla xanım Əliyevanın təşəbbüsü ilə “Xocalıya ədalət” kampaniyasının keçirildiyini və iştirakçıları bu məqsədlə dünayanın müxtəlif ölkələrinin rəsmilərinə ünvanladığı müraciətə imza atmağa çağırmışdır.
Fransanın Azərbaycandakı ilk səfiri Jan Perren Xocalı faciəsinin ölkəmizdə fəaliyyətə başladığı dövrə təsadüf etdiyini xatırlatmış, faciənin XX əsrin ən dəhşətli soyqırımı olduğunu, dinc sakinlərə qarşı əsl qətliam törədildiyini, şəhər sakinlərinin bir qisminin öldürüldüyünü, bir qisminin əsir götürüldüyünü, canlarını qurtarmaq üçün dağlara qaçan insanların bir çoxunun yolda qışın sərt şaxtasında donduğunu qeyd etmişdir.
Keçmiş səfir həmin dövrdə yaralıların yerləşdiyi xəstəxanalara baş çəkdiyini, onların insanları dəhşətə gətirən gecə barədə söhbətlərini dinlədiyini, xarici jurnalistlərin bu hadisəyə biganə qalmadıqlarını, Xocalı faciəsinin yalnız azərbaycanlılara qarşı deyil, bütün bəşəriyyətə qarşı yönəlmiş bir soyqırımı olduğunu diqqətə çatdırmışdır.
Azərbaycan-Fransa Gəncləri Assosiasiyasının sədri Mirvari Fətəliyeva Leyla xanım Əliyevanın təşəbbüsü ilə keçirilən “Xocalıya ədalət” kampaniyasını təqdim etmişdir. Sonra Xocalı faciəsindən bəhs edən klip nümayiş etdirilmişdir.
Mərasimdə Xocalı faciəsinin xatirəsinə həsr edilmiş klassik musiqi nümunələri ifa olunmuşdur. Sorbon Universitetinin magistri Səidə Zülfüqarova pianoda və fransız musiqiçisi Prisiy Laşa Sarret skripkada Azərbaycan və Avropa bəstəkarlarının əsərlərini səsləndirmişlər.
İştirakçılar Xocalı soyqırımına dair sərgi ilə tanış olmuşlar. Sərgidə faciə ilə bağlı Heydər Əliyev Fondunun nəşr etdirdiyi, Prezident Administrasiyası, Azərbaycanlıların və Türk Xalqlarının Əməkdaşlığı Mərkəzi tərəfindən təqdim olunmuş kitab və broşürlər, kiçik yaşlı rəssamların çəkdikləri rəsmlər, disklər və kasetlər nümayiş etdirilmişdir.
Əsgər Əliyev
AZƏRTAC-ın xüsusi müxbiri
Paris
######
 |
 |
Bölmənin digər xəbərləri
