Xocalı soyqırımı bəşər tarixinin ən qanlı səhifələrindən biridir
Bakı, 28 fevral (AZƏRTAC). Ahılların Resurs Mərkəzində Xocalı faciəsinin 19-cu ildönümü ilə bağlı “Xocalını tanıtma” mərkəzinin üzvləri ilə görüş keçirilmişdir.
Görüşdə Ombudsman Aparatının əməkdaşları, mərkəzin və Azərbaycan Uşaq və Gənclərin Sülh Şəbəkəsinin üzvləri iştirak etmişlər.
Ombudsman Aparatından AZƏRTAC-a bildirmişlər ki, təsisatın nümayəndəsi tarix boyu erməni millətçiləri və onların havadarları tərəfindən Azərbaycan xalqına qarşı qanlı cinayətlər, terror aktları törədildiyini, on minlərlə azərbaycanlının kütləvi surətdə qətlə yetirildiyini, öz torpaqlarından deportasiya olunduğunu qeyd etmişdir. Müvəkkilin Xocalı soyqırımının ildönümü ilə bağlı verdiyi bəyanatın nüfuzlu beynəlxalq təşkilatlara və xaricdəki ombudsmanlara ünvanlandığı diqqətə çatdırılmışdır.
Ahılların Resurs Mərkəzinin rəhbəri Şövkət Xanməmmədova bu soyqırımının bəşər tarixinin ən qanlı səhifələrindən biri olduğunu söyləmiş, faciənin iki yüz ilə yaxın bir müddətdə erməni millətçilərinin Azərbaycan xalqına qarşı apardığı etnik təmizləmə və soyqırımı siyasətinin daha bir dəhşətli nümunəsi olduğunu bildirmişdir.
Tədbirdə Xocalı soyqırımının təcavüzkar Ermənistanın ölkəmizə qarşı apardığı çirkin siyasətin davamı, əsl genosid aktı olduğu vurğulanmışdır.
Bölmənin digər xəbərləri
