XORVATİYA PREZİDENTİNİN AZƏRBAYCAN TELEVİZİYASINA MÜSAHİBƏSİ
Oktyabrın 3-də Xorvatiya Respublikasının Prezidenti Stepan Mesiç Azərbaycan Televiziyasına müsahibə vermişdir.
- Xorvatiyanın xarici siyasətində Azərbaycana nə dərəcədə yer ayrılır?
- Hazırda Xorvatiyanın siyasəti Avropa İttifaqı tərəfə yönəlmişdir. Lakin biz Avropa İttifaqına daxil olmayan ölkələrlə də mehriban qonşuluq münasibətləri yaratmağa çalışırıq. Bizim əməkdaşlıq etmək istədiyimiz ölkələr arasında Qazaxıstanın və Azərbaycanın adını çəkərdim. Elə buna görə də mən buraya böyük nümayəndə heyəti ilə gəlmişəm.
Prezident İlham Əliyev bizim ölkədə səfərdə olmuşdur, indi isə mən buraya rəsmi səfərə gəlmişəm. Biz Azərbaycan Prezidenti ilə razılığa gəldik ki, əməkdaşlığımız bütün səviyyələrdə həyata keçirilsin.
- Azərbaycan və Xorvatiya prezidentlərinin qarşılıqlı səfərləri ikitərəfli münasibətlərə necə təkan verir?
- Biz ən yüksək səviyyədə səfərlər mübadiləsi etdik. Baş nazirlər, nazirlər, habelə parlament nümayəndə heyətləri səviyyəsində də səfərlər mübadiləsi olacağını gözləyirik. Təbii ki, bu səfərlər işgüzar dairələrin nümayəndələrinin səfərləri ilə də müşayiət olunacaqdır. Biz hərtərəfli, o cümlədən incəsənət, idman sahələrində və başqa sahələrdə əməkdaşlıq yaratmaq istərdik.
- Ölkələrimizin iqtisadi əməkdaşlıq perspektivləri necədir və Sizin fikrinizcə, ən öncül istiqamətlər hansılardır?
- Hazırda Xorvatiya Avropa İttifaqına daxil olmaq ərəfəsindədir. Biz Avropa İttifaqına daxil olmaq üçün çox qısa müddətdə bütün zəruri standartlara cavab verəcəyik. Bu isə o deməkdir ki, Azərbaycan bizim vasitəmizlə və gələcək müştərək müəssisələr vasitəsilə Avropa İttifaqında mühüm rol oynayacaqdır. Biz əməkdaşlığın konkret istiqamətlərini də nəzərdən keçirmişik. Bunlar gəmiqayırma, əczaçılıq sənayesi, neft və qaz kəşfiyyatı, tikinti sahələridir. Biz infrastrukturun inkişafı, xəstəxanaların, məktəblərin tikilməsi barədə danışdıq. Həmin danışıqlarda bütün bu sahələr müzakirə edildi. Gələcəkdə bu məsələləri konkretləşdirməyə çalışacağıq.
- Avratlantik strukturlarına inteqrasiya prosesində Azərbaycanla Xorvatiya arasında əməkdaşlığın hansı istiqamətlərini daha vacib hesab edirsiniz?
- Avropa, deməli, Xorvatiya da, enerji daşıyıcıları ilə təchizat məsələsində daha geniş seçim imkanına malik olmaq istərdi. Biz bu sahədə yalnız bir ölkədən asılı olmaq istəməzdik, eyni vaxtda bir neçə mənbədən istifadə etmək istərdik. Azərbaycan məhz o ölkədir ki, onun vasitəsilə biz bu mühüm məqsədimizə çata bilərik, yəni daha çox sayda enerji daşıyıcıları mənbələrinə malik ola bilərik.
- Cənab Prezident, artıq iki gündür ki, Siz Azərbaycandasınız, çox şey görməyə imkanınız olub. Ölkəmiz barədə Sizdə necə təəssürat yaranmışdır və Azərbaycan xalqına nə arzu etmək istərdiniz?
- Artıq yeddi il yarımdır ki, mən Prezidentəm. Bu müddətdə çox ölkələrə getmişəm, sürətlə inkişaf etməkdə olan çox dövlətlər görmüşəm. Lakin Azərbaycan onların arasında birinci yerdədir. Azərbaycan həqiqətən dünyada ən intensiv inkişaf sürətinə malikdir. Mənim Bakıda gördüklərimi dünyanın heç bir ölkəsində görmək mümkün deyildir. Burada tikinti işləri çox geniş vüsət almışdır, bərpa edilən, yenidən qurulan obyektlər çoxdur. Bu o deməkdir ki, beş ildən sonra Bakıya gələn insan yüksələn xətt boyunca inkişaf etməkdə olan bu şəhəri, sadəcə, olaraq tanımayacaqdır. Bu dövlət və bu xalq yüksələn xətt boyunca inkişaf edir.
Mən Azərbaycan xalqına elə bu istiqamətdə və sürətlə inkişafı davam etdirməsini arzulamaq istərdim. Arzum budur ki, Azərbaycan xalqı özünün bütün problemlərini, o cümlədən Dağlıq Qarabağ problemini də həll etsin.
Bölmənin digər xəbərləri
