YAPONİYADA “AZƏRBAYCAN MİLLİ MUSİQİSİ VƏ RƏQSİ” ADLI TƏDBİR KEÇİRİLMİŞDİR

27.11.2006 [13:22]
Çap et
A⁺ A^-

AZƏRTAC xəbər verir ki, noyabrın 25-də Azərbaycan-Yaponiya Dostluq Cəmiyyətinin təşkilatçılığı ilə “Qafqaz-Xəzər Salonu” proqramı çərçivəsində Osaka şəhərində “Azərbaycan milli musiqisi və rəqsi” adlı növbəti tədbir keçirilmişdir.

Dostluq cəmiyyətinin sədri, “Qafqaz-Xəzər Salonu” layihəsinin müəllifi, Osaka Universitetinin tədqiqatçı alimi Rəhman Şahhüseynli tədbiri açaraq layihə çərçivəsində görülmüş işlərdən, bu cür tədbirlərin Azərbaycan ilə Yaponiya arasında dostluq əlaqələrinin inkişafında əhəmiyyətindən danışmışdır. O demişdir ki, “Qafqaz-Xəzər Salonu” layihəsinin növbəti mərhələsində dekabrın 28-də Osaka şəhərində Dünya Azərbaycanlılarının Həmrəyli günü münasibətilə möhtəşəm tədbir keçiriləcəkdir. R.Şahhüseynli bütün iştirakçıları həmin tədbirə dəvət etmişdir.

Osakanın tanınmış elm xadimləri, ziyalılar, ictimaiyyətin, eləcə də türk diaspor təşkilatları nümayəndələrinin iştirak etdiyi bu tədbirin sonunda peşəkar rəqqas Ramil Cəfərov milli rəqslərimizi ifa etmişdir. Sonra, Azərbaycanın milli rəqsləri və klassik musiqimizlə bağlı video-materialların nümayişi olmuşdur.

Yaponlar milli mədəniyyətimizə, rəqs və musiqimizə heyranlıqlarını bildirmiş, milli musiqimizin sədaları altında rəqs etmişlər.