Yeni Azərbaycan Partiyası zəngin və şərəfli inkişaf yolu keçib
Bakı, 3 noyabr, AZƏRTAC
Yeni Azərbaycan Partiyasının (YAP) yaranmasının 25-ci ildönümü münasibətilə partiyanın Nizami rayon təşkilatının SOCAR İnformasiya Texnologiyaları və Rabitə İdarəsi ərazi ilk partiya təşkilatında tədbir keçirilib.
AZƏRTAC xəbər verir ki, əvvəlcə tədbir iştirakçıları ulu öndər Heydər Əliyevin büstü önünə gül dəstələri düzüblər.
Azərbaycanın dövlət himni səsləndirildikdən sonra Ümummilli Liderin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla yad edilib.
Tədbirdə çıxış edən SOCAR İnformasiya Texnologiyaları və Rabitə İdarəsinin rəisi İlham Aslanov deyib ki, bu gün sıralarında cəmiyyətin bütün təbəqələrini əhatə edən 700 mindən çox insanı birləşdirən Yeni Azərbaycan Partiyası ümummilli lider Heydər Əliyevin parlaq ideyalarının daşıyıcısı kimi, cəmiyyətdə öz aparıcı rolunu gündən-günə möhkəmləndirir.
İdarə üzrə ərazi ilk partiya təşkilatının sədri, YAP Nizami rayon təşkilatı İdarə Heyətinin üzvü Nofəl Abdullayev çıxış edərək Azərbaycan dövlətçiliyinin formalaşmasında, ictimai-siyasi sabitliyin bərqərar olmasında, ölkəmizin beynəlxalq aləmdə nüfuzunun artmasında Yeni Azərbaycan Partiyasının mühüm xidmətlərinin olduğunu qeyd edib.
YAP Nizami rayon təşkilatının sədri, Milli Məclisin deputatı Sədaqət Vəliyeva çıxışında vurğulayıb ki, zəngin və şərəfli inkişaf yolu keçən Yeni Azərbaycan Partiyasının ümummilli lider Heydər Əliyev tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi cəmiyyət qurulmasından, əmin-amanlıq, ictimai-siyasi sabitlik, milli həmrəylik, güclü və sosialyönümlü iqtisadiyyat yaradılmasından ibarətdir. O YAP-ın zamanın çətin sınaqlarından şərəflə çıxdığını, böyük siyasi qüvvəyə çevrildiyini bildirib. Partiyanın sıralarının gündən-günə artmasının əsas səbəbi ondadır ki, YAP-ın yaradıcısı, ilk rəhbəri dahi şəxsiyyət, Azərbaycan xalqının xilaskarı, ümummilli lider Heydər Əliyev olub. Partiyanın nüfuzu ondadır ki, hazırda bu siyasi birliyə Heydər Əliyev ideyalarının layiqli davamçısı Prezident İlham Əliyev rəhbərlik edir.
Sonda partiyanın işində xüsusi fəallığı ilə seçilən bir qrup şəxsə fəxri fərmanlar təqdim edilib.
Bölmənin digər xəbərləri
