“Yer Saatı-2016” - “İqlim dəyişikliyinə Bir İşıq Saç!” şüarı altında keçiriləcək
Bakı, 25 fevral, AZƏRTAC
“Yer saatı - 2016” kampaniyası Ümumdünya Təbiəti Mühafizə Fondunun (WWF) Azərbaycan nümayəndəliyi və GREEN BAKU Ekoloji Gənclər Birliyinin birgə təşkilatçılığı ilə keçirilir.
Ümumdünya Təbiəti Mühafizə Fondunun Azərbaycan nümayəndəliyindən AZƏRTAC-a bildiriblər ki, builki tədbir Bakıda martın 19-da saat 20:30-da şəhərində “İqlim dəyişikliyinə Bir İşıq Saç!” şüarı altında keçiriləcək.
“Yer saatı” kampaniyası ilk dəfə WWF tərəfindən 2007-ci ildə Avstraliyada keçirilib. Kampaniyanın məqsədi ictimaiyyətin diqqətini iqlim dəyişikliyinin yaradacağı fəsadlara yönəltməkdir. “Yer saatı” aksiyaları zamanı böyük şəhərlərdəki məşhur binaların fasad işıqları bir saatlıq söndürülür və bu rəmzi hərəkətlə insanları enerjiyə qənaət edilməsinə təşviq edirlər.
Məlum olduğu kimi, elektrik enerjisinin alınması nəticəsində atmosferə buraxılan istixana qazları iqlim dəyişikliyinin başlıca səbəblərindən hesab olunur. Bununla əlaqədar, “Yer saatı” aksiyaları zamanı enerjidən davamlı istifadə xüsusi vurğulanır.
Hər il mart ayının son şənbə günü qeyd olunan “Yer saatı” kampaniyasına beynəlxalq ictimaiyyət tərəfindən diqqətin artması müşahidə olunur və bunun nəticəsi olaraq, 2015-ci ildə dünyanın 172 ölkəsinin 7000-dən çox şəhəri və bir milyarda yaxın insan bu kampaniyaya qoşulmuşdur.
Bölmənin digər xəbərləri
