QAN YADDAŞI
20 Yanvar xalqın azadlıq, müstəqillik arzusunun çiçəkləndiyi gündür
Bakı, 19 yanvar, AZƏRTAC
1980-ci illərin sonu idi. Böyük imperiya süquta doğru gedirdi. Sovet hökuməti həm siyasi, həm də iqtisadi cəhətdən çökmüşdü. Belə bir vəziyyətdə qatil Mixail Qorbaçov hakimiyyətə gəldi. O, SSRİ-ni süqutdan xilas etmək üçün “Yenidənqurma” və “Aşkarlıq” siyasəti həyata keçirtməyə başladı. Lakin bu siyasət heç bir işə yaramadı. Bunu görən SSRİ rəhbərliyi cəmiyyətin diqqətini yayındırmaq üçün Qərbi Azərbaycanda və Qarabağda yaşayan erməniləri azərbaycanlılara qarşı qızışdırmağa başladı. Nəticədə Qərbi Azərbaycanda yaşayan azərbaycanlılar öz dədə-baba yurdlarından didərgin salındı.1988-ci ildə xalqın səbri tükəndi və meydanlarda öz etirazlarını bildirməyə başladı. Bu etirazlar 1990-cı ilin yanvar ayının 19-dan 20-nə keçən gecəyə qədər davam etdi. Xalqımız azadlıq müstəqillik ədalət tələb edirdi. Bu etirazlar xalqımızın birlik rəmzidir.
Bu fikirlər Azərbaycan Dövlət İqtisad Universitetinin 1-ci kurs tələbəsi, UNEC Tələbə Həmkarlar İttifaqı mədəni-kütləvi tədbirlər komissiyasının layihə meneceri Ziyad Ağayev “Xalqın azadlıq, müstəqillik arzusu” sərlövhəli məqaləsində yer alıb.
Tələbə Ziyad Ağayev qeyd edib ki, şairimiz Bəxtiyar Vahabzadə vurğuladığı kimi, xalqımız o qanlı gecədə bir çox namümkünü mümkünə çevirdi. Kimin ağlına gələrdi ki, vaxt gələcək Azərbaycan xalqı hər kəsin gözündə şişirdilmiş Qırmızı Orduya qarşı çıxacaqdı. 1990-cı il yanvarın 19-da Bakıda fövqəladə vəziyyət elan edilməsi haqqında əmr verildi. Lakin axşam saatlarında Azərbaycan televiziyasının enerji bloku partladıldığına görə bu əmr əhaliyə xəbər edilməmişdi. Saat 23:50-də qatil Sovet ordusu Bakıya daxil oldu. Xalqımız mərd, cəsarətli, qorxmaz olduğu üçün Bakıya gələn tankların qarşısından qaçmadı. Qorxmadan, çəkinmədən o tankların qarşısına əliyalın çıxdı. Nəticədə Yanvar hadisələri zamanı 150 nəfər günahsız insan qətlə yetirildi, 750-yə yaxın insan isə yaralandı.
Bu qanlı gecənin səhəri günü Azərbaycan xalqının mərd oğlu, Ulu Öndərimiz Heydər Əliyev heç nədən qorxmadan, çəkinmədən Azərbaycanın Moskvadakı Daimi nümayəndəliyinə gələrək bu cinayətkarların cəzalandırılmasını qəti şəkildə tələb etdi.
Bakıda fövqəladə vəziyyət elan edilməsinə baxmayaraq, yanvarın 22-də iki milyon insan yenidən meydanlara toplaşaraq şəhidlərini dəfn etdi. Bu, xalqımızın birliyinin rəmzi idi.
“Biz müstəqil, qalib xalqın nümayəndələriyik. Biz 1988-1990-cı illərdə olan birliyi 2020-ci ildə İkinci Qarabağ müharibəsində də gördük. Xalqımız “Dəmir yumruq” əməliyyatı zamanı Müzəffər Ali Baş Komandan İlham Əliyevin və qalib Azərbaycan Ordusunun ətrafında sıx birləşdi.
Biz Azərbaycan xalqı olaraq inanırıq ki, Qarabağımıza, Şuşamıza, Cəbrayılımıza, Kəlbəcərimizə qayıtdığımız kimi, tarixi torpaqlarımız olan Qərbi Azərbaycanımıza, İrəvanımıza, Zəngəzurumuza da qayıdacağıq.
Biz Azərbaycan gəncləri Ali Baş Komandan, Prezident İlham Əliyevi daim dəstəkləyirik”, - deyə Ziyad Ağayev bildirib.