Moldovada Azərbaycan xalçalarına həsr olunmuş sərgi açılıb VİDEO
Kişineu, 19 may, AZƏRTAC
Azərbaycanın zəngin mədəni irsi, xalqımızın həyat tərzi və qədim adət-ənənələri ilə sıx bağlı olan xalçaçılıq sənəti və məktəbinin Avropada tanıdılması məqsədilə Kişineu şəhərindəki Moldova Milli Tarix Muzeyində Azərbaycan xalçalarına həsr olunmuş sərgi açılıb.
AZƏRTAC xəbər verir ki, “Gözəlliyin harmoniyası” adlı sərgidə Azərbaycanın müxtəlif xalçaçılıq məktəblərinə aid klassik və müasir dizaynda çoxsaylı xalça nümunələri sərgilənir. Həmçinin böyük ekran vasitəsilə xalçaçılıq sənətini, eləcə də tanınmış xalça toxucularımızdan bəhs edən film nümayiş olunub. Tədbirdə Moldova dövlət qurumlarının nümayəndələri, moldovalı deputatlar, xarici səfirliklərin diplomatları, diaspor fəalları, şəhər sakinləri iştirak ediblər.
Azərbaycanın Moldovadakı səfiri Ülvi Baxşəliyev çıxışında bildirib ki, Azərbaycan xalçası dünya mədəniyyətinin ən böyük sərvətlərindən biridir. Azərbaycan xalçaçılığı UNESCO tərəfindən bəşəriyyətin qeyri-maddi mədəni irsinin bir hissəsi kimi tanınan bədii sənətkarlığın ən qədim növlərindən biridir.
“Müasir Azərbaycan xalçaçılığının inkişafını dövlət dəstəyi və mədəni irsin qorunmasına strateji yanaşma olmadan təsəvvür etmək mümkün deyil. Bu prosesdə Azərbaycan Respublikasının Prezidenti İlham Əliyevin və Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın xüsusi rolu var. Onların diqqət və səyi nəticəsində xalçaçılıq mədəniyyət sahəsində prioritet dövlət siyasəti səviyyəsinə yüksəlib, bütün ölkədə xalça mərkəzləri yaradılıb və müasirləşdirilib, ənənəvi məktəblər dirçəldilib, Azərbaycan Milli Xalça Muzeyi yaradılıb”, - deyə səfir əlavə edib.
Moldovanın mədəniyyət naziri Sergiu Prodan çıxışında qeyd edib ki, bu sərgi sadəcə bədii təqdimat deyil, ölkələrimiz arasında səmimi və perspektivli dialoqun göstəricisidir. Mədəniyyət xalqlar arasında ən davamlı körpüdür.
“Bu gün nümayiş etdirilən xalçalar, sadəcə, bəzək əşyaları deyil, onlar diqqətlə işlənmiş hekayələr, ənənələrin, kollektiv yaddaşın, Azərbaycan milli kimliyinin əks-sədasıdır. Hər motiv, hər rəng, hər ilmə dərin məna, nəsildən-nəslə ötürülən dəyər daşıyır”, - deyə nazir vurğulayıb.
"Azərxalça" ASC İdarə Heyətinin sədri, Əməkdar incəsənət xadimi Emin Məmmədov çıxışında iki ölkə arasında mədəni mübadilənin vacibliyini qeyd edib, sənətin sərhəd tanımadığını və insanların mənsubiyyətindən asılı olmayaraq bir-birini birləşdirdiyini vurğulayıb. 100 illik “Azərxalça” ASC tarixindən söz açan sədr bildirib ki, qurumun tarixi boyunca ən böyük məqsədi Azərbaycan xalçaçılıq sənətinin inkişafı, təbliğat və təşviqatı olub. Emin Məmmədov çıxışında mayın əvvəlində Bakıda keçirilən, dünyaya səs salan Beynəlxalq Xalça Festivalından, sərgidə nümayiş olunan bütün xalçaçılıq məktəblərinə aid xalçalardan da danışıb. Cəmiyyətin istehsal etdiyi xalçaların ərsəyə gəlməsində yerli və xarici rəssamlarla, eləcə də dizaynerlərlə əməkdaşlıq çərçivəsində ənənəvi xalçalara istinadla müasir xalçalar yaradıldığını və beləliklə, xalça sənətinin daim inkişaf etdiyini diqqətə çatdırıb.
Sonra tədbirdə çıxış edən muzeyin direktoru Eudjen Sava, Moldova Parlamentinin deputatı, Azərbaycanla Dostluq Qrupunun sədri Vitali Yakot sərginin əhəmiyyətindən danışıblar.
Daha sonra Azərbaycan dövləti adından Moldova Milli Tarix Muzeyinə iki milli xalçamız hədiyyə olunub.
Tədbir Azərbaycan milli musiqisinin təqdimatı ilə başa çatıb.
Tədbirdən sonra "Azərxalça" ASC İdarə Heyətinin sədri Emin Məmmədov AZƏRTAC-a açıqlamasında bildirib ki, Beynəlxalq Muzeylər Günündə Moldovanın nüfuzlu muzeyində Azərbaycan xalçalarının sərgisinin açılması olduqca əhəmiyyətlidir. “Sərgidə Azərbaycandan gələn toxucu da var. Sərginin açılışından əvvəl ustad dərsləri də keçirilib. Muzeyin rəhbərliyinin açıqlamasına görə, bu müddətdə muzeydə 10 min 600-dən çox ziyarətçi olub. Burada iştirak edən hər bir kəs Azərbaycan mədəniyyətinin bir parçasını aparır”, - deyə Emin Məmmədov əlavə edib.
Tədbirlə bağlı fikirlərini bölüşən Moldova Milli Tarix Muzeyinin direktoru Eudjen Sava AZƏRTAC-a açıqlamasında bildirib ki, digər xarici ölkələrdə də nüfuzu ilə tanınan Azərbaycan xalçalarının Moldovada sərgisi ilk dəfə təşkil olunur. Bu cür sərgilərin keçirilməsi Moldova ilə Azərbaycan arasında etnik, mədəni əlaqələrin möhkəmləndirilməsində olduqca vacibdir. “Azərbaycanın Moldovadakı səfirliyi ilə muzeydə bir neçə tədbir və sərgi keçirilib. O cümlədən bir neçə il öncə Azərbaycanın tanınmış siyasi Lideri Heydər Əliyevə həsr olunan yubiley sərgisi açılıb. İnanıram ki, bu əməkdaşlıq gələcəkdə də davam edəcək”, - deyə muzeyin direktoru əlavə edib.
Qeyd edək ki, sərginin kolleksiyasına müxtəlif ölçülü, fərqli xalçaçılıq məktəblərinə aid həm müasir, həm də klassik üslubda toxunmuş 22 xalça daxildir.
Sərgi iyulun 31-dək davam edəcək.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
