Qızardılmış yeməklər həftədə bir dəfədən çox yeyilməməlidir
Bakı, 12 iyun, AZƏRTAC
Hər kəs sağlam orqanizm arzusunda olsa da, adətən qidaların faydasına deyil, dadına daha çox əhəmiyyət verir. Gündəlik və həftəlik rasionda qızardılmış yeməklər mütləq yer tutur. Lakin bunu mütəxəssislər qətiyyən tövsiyə etmirlər.
Həkim-diyetoloq Ləman Süleymanova AZƏRTAC-a deyib: “Qızardılmış qidaların tərkibində müəyyən maddələr var ki, onlar aktivləşir və əgər ət və tərəvəz məhsulları təbiidirsə, həftədə bir dəfə ondan istifadə etmək olar, lakin hər gün qızardılmış qidalardan istifadə etmək mədə-bağırsaq xəstəliklərinə səbəb ola bilər”.
Qızardılmış xörəklərin bişirilmə qaydasına da fikir vermək lazımdır. Həmin xörəklərin az miqdarda bitki yağı ilə bişirilməsi məsləhətdir. Çox yağ, çox duz və çox istiotdan istifadə edilməsi qidanın təbii dadını qaçırır. Eyni yağdan bir neçə dəfə istifadə edilməsi də sağlamlıq üçün birbaşa təhlükə yaradır. Həkim-diyetoloqun dediyinə görə, eyni yağdan istifadə konsoregen və mutagen təsirli qida zəhərlənməsi ilə nəticələnə bilər.
Düzgün qaydada bitki yağlarında qızardılan qidalardan istifadə etmək olar, lakin istənilən halda həmin yeməklər həftədə bir dəfədən çox yeyilməməlidr.
Bölmənin digər xəbərləri
