İQTİSADİYYAT


SOCAR: Bu il Azərbaycana 1,59 milyard kubmetr qaz idxal olunub

Bakı, 16 oktyabr, AZƏRTAC

SOCAR cari ilin 3 rübü üzrə qazma, hasilat və ixrac göstəricilərini açıqlayıb.

AZƏRTAC şirkətə istinadla xəbər verir ki, SOCAR bu ilin üçüncü rübündə qazma işlərin həcmini artırmaqla neft hasilatını sabitləşdirməyə, təbii qaz hasilatını isə önəmli dərəcədə artırmağa nail olub. Rüb ərzində SOCAR üzrə hasilat 1,9 milyon ton neft və 1,67 milyard kubmetr qaz təşkil edərək əvvəlki ilin analoji göstəriciləri ilə müqayisədə müvafiq olaraq 1,5 faiz və 11 faiz nisbətində çox olub. Ümumiyyətlə, cari ilin doqquz ayında respublika üzrə 29 milyon ton neft və 22 milyard kubmetr təbii qaz hasil olunub. Bu isə ötən ilin müvafiq dövrü ilə müqayisədə ölkə üzrə neft hasilatında təqribən 0,8 faiz, qaz hasilatında isə 4,5 faiz artıma nail olunduğunu göstərir.

Rüb ərzində SOCAR tərəfindən 42 min metrdən çox qazma işi həyata keçirilib ki, bu da əvvəlki ilin müvafiq dövrün göstəricisi ilə müqayisədə 43 faiz çoxdur. SOCAR üzrə hasilatın sabitləşməsi üçün qazma həcminin artırılması ilə yanaşı, köhnə quyular da bərpa olunur, daha əvvəl istismardan çıxarılmış quyularda əsaslı təmir, geoloji-texniki tədbirlər aparılmaqla həmin quyularda hasilat bərpa edilir.

Bu ilin 9 ayı ərzində Azərbaycana 1,59 milyard kubmetr qaz idxal olunub və 6,48 milyard kubmetr qaz ölkədən ixrac edilib. Ölkəyə idxal olunan və ölkədən ixrac edilən qaz həcmləri üzrə ötən ilin müvafiq dövrü ilə müqayisədə müvafiq olaraq 22,6 faiz və 5,8 faiz artım qeydə alınıb. Doqquz ay ərzində SOCAR 871,8 milyon kubmetr qaz ixrac edib ki, bu da əvvəlki ilin müvafiq dövrü ilə müqayisədə 0,5 faiz çoxdur.

SOCAR Azərbaycanda öz imkanları ilə hasil etdiyi bütün təbii qaz həcmini Azərbaycan bazarına yönləndirir. Üçüncü tərəflərdən alınan qaz həcmləri isə əsasən ixrac üçün istifadə olunur və Azərbaycana əlavə gəlir qazandırır. Hazırda SOCAR-ın Azərbaycandakı qaz anbarlarında qış ayları üçün 3 milyard kubmetrdən çox qaz tədarük edilib.

Şirkət üzrə üçüncü rübdə xam neftin ixracı 6 milyon ton təşkil edib. Beləliklə SOCAR-ın xam neft ixracı əvvəlki ilin müvafiq dövrü ilə müqayisədə 9,3 faiz artıb. Rüb ərzində SOCAR üzrə Azərbaycandan 465,8 min ton neft emalı və neft-kimya məhsulu ixrac edilib ki, bu da ötən ilin müvafiq dövrü ilə müqayisədə 43 faiz çoxdur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.