Ağalı doğma sakinlərinə qucaq açıb - daha 12 ailə kənddə məskunlaşdı FOTO VİDEO
Zəngilan, 7 sentyabr, A.Yavərzadə, AZƏRTAC
İşğaldan azad edilmiş Zəngilan rayonunun Ağalı kəndinə sentyabrın 7-də əhalinin köçürülməsinin növbəti mərhələsi həyata keçirilib. İkinci mərhələnin ilk qrupu Abşeron rayonunun Masazır qəsəbəsində yerləşən “Zəngilan şəhərciyindən” öz doğma yurd-yuvalarına, Ağalıya dönüb.
AZƏRTAC-ın bölgə müxbiri xəbər verir ki, Ağalıda sakinləri Şərqi Zəngəzur iqtisadi rayonuna daxil olan Zəngilan rayonunda Azərbaycan Respublikası Prezidentinin xüsusi nümayəndəsi Vahid Hacıyev qarşılayaraq, onları əzəli torpaqlarına qayıtmaları münasibətilə təbrik edib.
Sonra kəndə köçən ailələrlə birlikdə burada yaradılan şəraitlə tanışlıq olub.
“Ağıllı kənd” konsepsiyası əsasında yenidən tikilən Ağalıya qədəm qoyarkən müasir şəhərsalma standartlarının tətbiq olunması diqqəti çəkir. Küçələrin “ağıllı” işıqlandırılması, isti və soyuğa davamlı ekoloji evlərin inşası, günəş panellərinin quraşdırılması kimi amillər bu konsepsiyanın tərkib hissələridir. Ümumilikdə, “ağıllı kənd” layihəsi yaşayış, istehsal, sosial xidmətlər, “ağıllı kənd təsərrüfatı” və alternativ enerji sahələri kimi komponentlər üzrə icra edilib. Ərazidə evlər, qeyri-yaşayış binaları, 360 şagird yerlik məktəb və 60 yerlik uşaq bağçası tikilib. Kəndin enerjiyə olan tələbatı alternativ enerji mənbələrindən əldə olunur.
Ağalı kənd meydanında Dövlət Xidmətləri Mərkəzi yaradılıb. Burada “Azərpoçt” MMC-nin rayon şöbəsi, “ASAN xidmət” və DOST, Kiçik və Orta Biznesin İnkişafı Mərkəzləri təsis olunub. Məqsəd kənd sakinlərinin dövlət xidmətlərinə rahat çıxışı təmin etməkdir. Bu mərkəzlərdə kənd sakinlərinə sosial təminat və məşğulluq sahəsində 100-dən çox xidmət onlayn formada göstərilir. Vətəndaş birbaşa videobağlantı ilə DOST mərkəzlərinin sosial agentinə müraciət edir və müraciəti yerindəcə həll olunur. “Ağıllı kənd” əhalisinin şəhərdə əldə edə biləcəyi bütün xidmətlərə, o cümlədən dövlət xidmətlərinə rahat çıxışı var.
Kənddə tikiş fabriki, ailə sağlamlıq mərkəzi (tibb məntəqəsi) də tikilib. Burada aptek, mağaza, kafe, mobil operator xidməti də fəaliyyət göstərir. Kənddə yaradılacaq “ağıllı kənd” təsərrüfatı idarəetmə sistemində ən müasir texnoloji yeniliklər tətbiq olunacaq.
Daha sonra xüsusi nümayəndəliyin əməkdaşları tərəfindən sakinlərə yeni evlərin açarları təqdim edilib.
Jurnalistlərin suallarını cavablandıran Prezidentin xüsusi nümayəndəsi Vahid Hacıyev bildirib ki, bu gün - sentyabrın 7-də Ağalıya 12 ailənin 63 üzvü köçürülüb. Sentyabrın 10-da isə 13 ailənin 62 üzvü kəndə gələcək. Ümumilikdə isə ikinci mərhələdə 25 ailənin 125 üzvünün Ağalıya köçürülməsi nəzərdə tutulur.
Onun sözlərinə görə, ilk mərhələdə köçürülən əhalinin məşğulluq məsələləri demək olar, həll edilib. “Buradakı insanların həyat şəraitini yaxşılaşdırmaq üçün müxtəlif xidmət sahələri üzrə infrastruktur obyektləri istifadəyə verilir. Artıq “ASAN xidmət” və DOST mərkəzləri, poçt, bank xidmətləri, bundan başqa, tibb məntəqəsi, uşaq bağçası, yanacaqdoldurma məntəqəsi, müasir standartlara cavab verən ət kəsimi məntəqəsi və s. fəaliyyət göstərir. Məktəbimiz də bu ilin sentyabr ayında ilk müəllim və şagirdlərini qarşılayacaq”, - deyə xüsusi nümayəndə bildirib.
Vahid Hacıyev onu da qeyd edib ki, Ağalıda məskunlaşacaq bütün sakinlərə dövlət tərəfindən eyni qayğı göstəriləcək, onların sosial rifahının yaxşılaşdırılması üçün müvafiq işlər görüləcək.
Bölmənin digər xəbərləri
