Bakı, 8 aprel (AZƏRTAC). Aprelin 4-dən 6-dək “Bakı Ekspo” sərgi və toplantı mərkəzində keçirilən “AITF-2013” Azərbaycan Beynəlxalq turizm və səyahətlər və “Horex Caucasus-2013” 7-ci Qafqaz Beynəlxalq mehmanxana, restoran və supermarketlər üçün avadanlıq və ləvazimatlar” sərgilərinin turizm potensialının inkişafı və məlumatlılığın artırılması baxımından rolunu xüsusi qeyd etmək lazımdır.

Sərginin daim möhkəmlənən imici xarici sahibkarların bu tədbirə göstərdikləri maraq, sərgi sahələrinə tələbatın artması və yeni eksponentlərin iştirakı ilə müəyyən olunur.

Sərginin rəsmi açılış mərasimində çıxış edən Azərbaycan Respublikasının mədəniyyət və turizm naziri Əbülfəs Qarayev tədbir iştirakçılarının sayının artdığını vurğulayaraq demişdir ki, bu amil ölkəmizdə turizm hərəkatının daimi inkişafından və dünyanın aparıcı turoperator ölkələrinin Azərbaycana böyük diqqət yetirdiyindən xəbər verir. Sərgidə iştirak edən ölkələrin coğrafiyası isə ildən-ilə genişlənir. Bunu yenicə başa çatmış sərginin yekunları bir daha sübut edir. “AITF-2013” sərgisində 35 ölkədən 60-dan çox istiqaməti təmsil edən 251 şirkət iştirak etmişdir.

Azərbaycan Respublikası Mədəniyyət və Turizm Nazirliyinin dəstəyi ilə “ITE Group plc” və onun tərəfdaşı “Iteca Caspian” MMC tərəfindən təşkil olunan sərgidə Azərbaycanın diqqətəlayiq turizm marşrutu kimi zəngin turizm potensialı əyani şəkildə nümayiş etdirilmiş, 2013-cü ilin turizm mövsümündə yeni üfüqlər açılmışdır. Yerli eksponentlər, o cümlədən “Millennium Tourism & Congress DMC”, “Gilan Turizm”, “N-Travel”, “SilkWay Travel” və s. şirkətlər həm xaricdə, həm də Azərbaycan ərazisində istirahətin təşkili üzrə xidmətlərin tam çeşidini təklif etmişlər.

Azərbaycanın öz iqlim xüsusiyyətləri, təbii sərvətləri və çoxmillətli mədəniyyəti olan iyirmidən çox regionu məhsullarını, habelə istirahət zonalarının, otel və pansionatların cəlbedici təklifləri ilə çıxış edərək, yay istirahəti üçün ən maraqlı marşrutu müəyyən etmək istəyən yerli və xarici turizm şirkətlərinin və çoxsaylı ziyarətçilərin diqqətini cəlb etmişdir. Musiqi və mahnı sədaları altında qarşılanan, milli şirniyyatlara qonaq edilən və bütün istək və arzuları nəzərə alınan potensial müştəridə istər-istəməz əla xidmətə və unudulmaz təəssüratlara zəmanət verən təşkilata qarşı rəğbət və hörmət hissi yaranır.

Səyahətlər aləminin müasir təchizatçılarını da turizm məhsullarının satışında tətbiq olunan bu cür yanaşma tərzi birləşdirir. Buna görə də Azərbaycana bu qədər böyük maraq göstərilir, onun tərəqqisi və çiçəklənməsinə bu qədər böyük inam bəslənilir. Bu da öz növbəsində işgüzar təkliflərin və gələcək əməkdaşlığın yeni dalğasını gətirir.

Təqdirəlayiq haldır ki, sərginin daimi iştirakçıları ilə yanaşı, bu dəfə Mərakeş, Macarıstan, Sloveniya, Monteneqro, Tailand, Monako, Tunis və Fransanın təmsilçiləri ilk dəfə Bakıya səfər etmişlər. Onları turizm sahəsində davamlı əlaqələr qurmaq və Azərbaycan ilə qarşılıqlı faydalı əməkdaşlıq konsepsiyasını işləyib hazırlamaq arzusu birləşdirir. Türkiyə, Gürcüstan, Çexiya, Birləşmiş Ərəb Əmirlikləri, Rusiya, Malayziya və bir sıra digər ölkələrdən olan ənənəvi sərgi iştirakçıları bu cür biznes planlarının uğur qazanacağına inamlarını ifadə etmişlər.

İyirmi ölkəni təmsil edən çoxlu sayda milli stendin iştirakı da “AITF” sərgisinin artan nüfuzunu bir daha göstərmişdir. “Azerbaijan Airlines”, “Turkish Airlines”, “China Southern Airlines”, “Air Astana”, “Adria Airways” (Sloveniya) və s. aviaşirkətlər sərgidə ayrıca stendlərlə iştirak etmişlər.

Bir çox beynəlxalq ekspertin və bu sahə üzrə ixtisaslaşan peşəkar mütəxəssislərin qənaətinə görə, sərgi zamanı “Bakı Ekspo” sərgi və toplantı mərkəzinin pavilyonlarında rahat şərait və məsuliyyətli xidmət sayəsində olduqca səmimi və mehriban ab-hava hökm sürmüşdür. Belə bir şəraitdə isə bu il əsasən turizm sahəsinin mütəxəssislərindən ibarət olan ziyarətçilərə ən yaxşı təəssürat bəxş etmək istəyi yaranır.

İndoneziyalıların bambukdan hazırlanmış ksilofon alətində çox gözəl ifaları isveçrəlilərin qonaq etdikləri dadlı və isti yeməklə elə bil rəqabətə girmişdi... Şərq bəzək məmulatlarını taxmaq, Qərb ölkələrinin eksklüziv içkilərini, zərif şərabları və ətirli qəhvələri dadmaq, tərəvəz və meyvələrdən düzəldilmiş çox mahir “heykəltəraşlıq” nümunələrinə tamaşa edərək zövq almaq imkanını isə pulsuz yollayışlardan və nəqliyyat biletlərindən ibarət uduşlar təklif edən oyunların bəxş etdikləri xoş həyəcan tamamlayırdı.

Sərgi çərçivəsində ənənəvi görüşlər keçirilmiş, əməkdaşlıq müqavilələri imzalanmış, habelə yeni turizm proqramları və qiymət siyasəti müzakirə olunmuşdur. Bir çox debütant şirkətlər sərginin müsbət cəhətlərini layiqincə qiymətləndirdikləri üçün “AITF” sərgisində gələcəkdə də iştirak etmək istədiklərini bəyan etmişlər.

Əlbəttə, ənənəvi təqdimatlar sərginin qonaqları və iştirakçıları tərəfindən rəğbət hissi ilə qarşılanmışdır. Avropa İttifaqının “Azərbaycan Respublikası Mədəniyyət və Turizm Nazirliyi nəzdində turizm şöbəsinin imkanlarının genişləndirilməsi” adlı Tvinninq layihəsinin təqdimatı isə daha əlamətdar bir hadisəyə çevrildi. Ümumilikdə 0,9 milyon avroluq büdcəyə malik olan 15 aylıq layihə Litvanın Turizm üzrə Dövlət Departamenti və Avstriya Federal Təchizat Agentliyi tərəfindən həyata keçiriləcəkdir.

Sərgi çərçivəsində Yunanıstanın “Aegean Airlines” aviaşirkəti mayın 28-də açılması planlaşdırılan Bakı-Afina birbaşa aviareysini, Azərbaycanın milli hava daşıyıcısı AZAL isə Bolqarıstana yeni aviamarşrutu təqdim etmişlər. Macarıstan stendində verilən məlumata görə, bu ilin yay ayında həftədə iki dəfə həyata keçiriləcək Budapeşt-Bakı birbaşa aviareysinin açılması planlaşdırılır. Demək olar ki eyni vaxtda, yəni iyun ayında Azərbaycan və Monteneqro arasında həftədə bir dəfə birbaşa çarter reysləri həyata keçiriləcəkdir.

Sərgidə, həmçinin Azərbaycanda öz bazarını genişləndirmək və qonşu ölkələrlə iqtisadi və ticarət əlaqələrini fəallaşdırmağı planlaşdıran İranın “Araz” azad iqtisadi zonasının imkanları da nümayiş etdirilmişdir.

Beləliklə, “AITF-2013” sərgisi bu il də müxtəlif ölkələrin turizm ekspertlərinin və səyahət həvəskarlarının, o cümlədən aparıcı turizm şirkətlərinin və sahibkarların beynəlxalq görüş yerinə çevrilmişdir. “Horex Caucasus-2013” sərgisi isə qısa müddət ərzində qonaqpərvərlik sahəsində yeni xidmətlərin aparıcı istehsalçıları və distribütorları ilə tanış olmaq, səmərəli müqavilələr imzalamaq və etibarlı podratçılar əldə etmək üçün nadir imkan yaratmışdır.