AKADEMİK ZƏRİFƏ ƏLİYEVA ADINA MƏKTƏBDƏ XOCALI SOYQIRIMI QURBANLARININ XATİRƏSİ ANILMIŞDIR
Bakı, 26 fevral (AZƏRTAC). Fevralın 26-da akademik Zərifə Əliyeva adına məktəbdə Xocalı qırğınının ildönümü ilə əlaqədar mərasim keçirilmişdir.
Faciə qurbanlarının xatirəsi bir dəqiqəlik sükutla yad edilmişdir.
Məktəbin direktoru Məhəbbət Vəliyeva 1992-ci il fevralın 25-dən 26-na keçən gecə erməni millətçilərinin keçmiş sovet imperiyasının 366-cı motoatıcı alayının köməyi ilə Xocalıda törətdikləri vəhşilikləri dünyada oxşarı olmayan faciə adlandırmışdır. O, uşaqların və qocaların, əliyalın dinc insanların qəddarcasına qətlə yetirildiyi həmin qanlı gecədə baş verənlərin yaddaşımızdan heç vaxt silinməyəcəyini vurğulamışdır.
Tədbirdə yazıçı-publisistlər Yusif Əhmədov, Fazil Güney və başqaları əsrlər boyu mənfur düşmənin xalqımıza qarşı soyqırımı siyasəti apardığını söyləmişlər.
Sonra F.Güneyin “Qara qan” romanı əsasında hazırlanmış ədəbi-bədii kompozisiya nümayiş etdirilmişdir.
Bölmənin digər xəbərləri
