Almaniya Bundestaqının deputatlarına Azərbaycanın turizm potensialı haqqında ətraflı məlumat verilmişdir
Berlin, 22 fevral (AZƏRTAC). Azərbaycanın Almaniyadakı səfiri Pərviz Şahbazov Bundestaqın turizm komitəsinin Azərbaycanın turizm potensialına həsr olunmuş 72-ci iclasında məruzəçi qismində çıxış etmişdir.
İclasın əvvəlində Azərbaycanın turizm potensialını əks etdirən film nümayiş olunmuşdur. Daha sonra səfir Azərbaycanın gözəl və zəngin təbiətinin, landşaftının, flora və faunasının, tarixi və memarlıq abidələrinin, zəngin mədəniyyətinin yaratdığı turizm potensialı, turizmin inkişafı istiqamətində ölkə rəhbərliyi tərəfindən görülən işlər, Ermənistan-Azərbaycan, Dağlıq Qarabağ münaqişəsinin turizm sektoruna vurduğu zərər, eləcə də Azərbaycan-Almaniya münasibətlərinin inkişaf dinamikası barədə iclas iştirakçılarını məlumatlandırmışdır.
Səfirin turizm komitəsinə dəvət olunması yaxın günlərdə Berlində təşkil olunacaq dünyanın ən böyük turizm sərgisi olan İTB ilə bağlı olmuşdur. Belə ki, səfirliyin təşəbbüsü ilə Azərbaycan bu il Berlin İTB sərgisinin “Konqres və mədəniyyət tərəfdaşı” rolunda çıxış edir. Bu çərçivədə, sərginin açılışında Azərbaycanın mədəniyyət və turizm naziri Əbülfəs Qarayevin də çıxış edəcəyi gözlənilir. Sərgidə Azərbaycan turizm stendi ilə yanaşı, mədəniyyət proqramı ilə də təmsil olunacaqdır.
Səfir çıxışında Azərbaycanın İTB Berlin tədbirində tərəfdaş kimi iştirakını ölkəmizin turizm potensialının Almaniyada tanıdılması üçün gözəl bir fürsət olduğunu vurğulamışdır. Pərviz Şahbazov, eyni zamanda, son illərdə ölkəmizdə bir sıra irimiqyaslı tədbirlərin keçirildiyinə diqqət çəkmiş, ölkəmizdə bir sıra nüfuzlu mehmanxanaların açılmasının ölkəmizin turizm potensialının göstəricisi olduğunu vurğulamışdır.
Daha sonra Bundestaq üzvləri Azərbaycanın turizm potensialı, eləcə də Azərbaycanla bağlı onları maraqlandıran suallarla səfirə müraciət etmişlər.
Bundestaq deputatları üçün maraqlı olan məsələlər Azərbaycanda turizmin hansı istiqamətdə inkişaf etdiyi və onun perspektivləri, xarici turistlərin Azərbaycanda hansı dildə ünsiyyət qurduqları, ölkəmizdə xarici turist şirkətləri üçün hər hansı əlaqələndirici qurumun olub-olmadığı idi. Komitə üzvlərindən biri xanım Helqa Daub Azərbaycan torpaqlarının 20 faizi işğal olunmuş və 1 milyondan artıq qaçqın və məcburi köçkünə sahib bir ölkə olaraq Azərbaycanın ITB sərgisində “Konqres və mədəniyyət tərəfdaşı” kimi iştirakını, turizm potensialı ilə yanaşı, bütünlüklə ölkəni tanıtmaq üçün bir fürsət olduğunu qeyd etmişdir. Bundan əlavə, səfir alman deputatları Azərbaycanın sosial-iqtisadi inkişafı və demokratik islahatların həyata keçirilməsi barədə də məlumatlandırmışdır.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
