Almaniyada turizm sahəsində təhsil və tədqiqat imkanları müzakirə edilmişdir
Bakı, 2 iyul (AZƏRTAC). Azərbaycan Turizm İnstitutunda (ATİ) Alman Akademik Mübadiləsi Xidmətinin (DAAD) təşəbbüsü ilə tələbələr, doktorluğa namizədlər, tədqiqatçılar və institut müəllimləri üçün Almaniyada təhsil və tədqiqat imkanları ilə bağlı tədbir keçirilmişdir.
ATİ-nin mətbuat xidmətindən AZƏRTAC-a bildirmişlər ki, tədbirdə bu ali təhsil ocağının rektoru, tarix elmləri doktoru, professor Cəfər Cəfərov, ümumilikdə, belə təqdimat-görüşlərin yüksək ixtisaslı kadr hazırlığında və inkişafında müstəsna əhəmiyyətini xüsusi vurğulamışdır.
DAAD-ın Bakı ofisinin direktoru xanım Nikola Ulliş qurumun fəaliyyəti, indiyədək görülən işlərdən söz açmışdır. Onun məhz Almaniyada təhsil almaq istəyənlər üçün “Azərbaycan üçün təqaüd və maliyyələşdirmə” mövzusundakı təqdimatı da iştirakçılar tərəfindən maraqla qarşılanmışdır.
ATİ-nin tədqiqat və inkişaf şöbəsinin baş məsləhətçisi Julius Arnegger isə Almaniyada ali təhsil sistemi barədə ətraflı məlumat vermiş və “Tədqiqat layihəsinin planlaşdırılması və idarə edilməsi” mövzusunda maraqlı təqdimatla çıxış etmişdir.
Görüşün sonunda N.Ulliş iştirakçıların çoxsaylı suallarını cavablandırmışdır.
Bölmənin digər xəbərləri
