Almatıda Azərbaycanın turizm imkanlarının geniş nümayiş olunduğu “KİTF-2013” sərgisi başa çatmışdır
Bakı, 27 aprel (AZƏRTAC). Xəbər verdiyimiz kimi, aprelin 24-dən 26-dək Qazaxıstanın Almatı şəhərində ənənəvi “KİTF-2013” Beynəlxalq turizm və səyahətlər sərgisi keçirilmişdir.
Tədbirdə iştirak edən Azərbaycan nümayəndə heyətinin üzvü, Mədəniyyət və Turizm Nazirliyinin mətbuat katibi Zöhrə Əliyevanın sərgi ilə bağlı təəssüratlarını bölüşərək demişdir: “Dünyanın 43 ölkəsindən 550 turizm şirkətinin iştirak etdiyi sərgi bir çox məqamları ilə yadda qalmışdır. Sərginin zəngin coğrafiyası həm bu ölkələrin turizm potensialı, həm də mədəniyyətini nümayiş etdirmək üçün səhnə olmuşdur. Bir çox stendlərdə müxtəlif xalqların rəqsləri ifa olunmuş, mahnılar səslənmişdir. Ayrı-ayrı stendlərdə el sənətkarları, mahir ustalar öz əl işlərini nümayiş etdirməklə yanaşı, həm də yerindəcə müxtəlif sənətkarlıq nümunələri düzəldir, onları ya stendə yaxınlaşanlara bağışlayır, ya da ucuz qiymətə satırdılar. Əlbəttə, bu, belə iş səyahətindən qalan ən yaxşı xatirə olacaqdır.
Ziyarətçiləri buraya cəlb edən başqa bir məqam müxtəlif stendlərdə imkanlı şirkətlərin keçirdikləri lotereya oyunları olmuşdur. Bir neçə günlüyə otel xərclərinin ödənilməsi və şəhər gəzintisi ilə təklif olunan turizm paketi hansı turisti cəlb etməz ki?
Üç gün müddətində Azərbaycanın ilk dəfə qatıldığı, Mərkəzi Asiyanın bir çox ölkələrini bir araya gətirən bu sərgidə adıçəkilən bölgənin ölkəmiz üçün də çox əhəmiyyətli turizm bazarı ola biləcəyi bir daha məlum olmuşdur.
Nümayəndə heyətinə rəhbərlik edən Mədəniyyət və Turizm Nazirliyinin daxili turizmin inkişafı sektorunun müdiri Mahir Qəhrəmanovun müşahidələri onu göstərir ki, gələcəkdə Bakı və Azərbaycanın müxtəlif regionları qazaxıstanlılar üçün cəlbedici turizm məkanına çevrilə bilər. Sərgi zamanı keçirilən görüşlər və aparılan danışıqlar bu fikri bir daha təsdiqlədi. Sərgidə iştirak edən turizm şirkətləri nümayəndələrimizə işgüzar təkliflərlə müraciət edir, gələcək üçün Azərbaycan ilə bağlı nikbin panlar qururdular.
Ötən illər bu sərgiyə müstəqil şəkildə qatılan “Millennium Tourism & Congress” şirkətinin və “Çinar Hotel & SPA Naftalan” otelinin əməkdaşları da Qazaxıstanın və başqa Mərkəzi Asiya ölkələrinin Azərbaycana böyük marağından söz açdılar. “Millennium Tourism & Congress DMC” şirkətinin rəhbəri Ruslan Quliyevin qənaətinə görə, bir neçə turizm hədəfi olan şirkət potensial turistlərə Azərbaycanın bir neçə istiqamətini təklif edir. Bunlar Bakı-Abşeron, Lənkəran-Astara, Duzdağ bölgələri və “Şahdağ” Qış-Yay Turizm Kompleksidir.
Ruslan Quliyev təklif olunan bütün istiqamətlərin olduqca böyük marağa səbəb olduğunu söyləmişdir. Abşeronun dənizi, cənub bölgəsinin isti suları, Duzdağın müalicəvi keyfiyyətləri, Sahdağın ekstrimi - hər şey turistlərə maraqlı gəlir. Hələ son vaxtlar Bakını görüb gələn turistlərin təəssüratlarını nəzərə alsaq, qazaxıstanlıların, Yunanıstan və başqa ölkələrin turizm şirkətlərinin marağını başa düşmək çətin deyil. Bunun nəticəsi olaraq turizm şirkətləri xeyli biznes görüşlər keçirmiş və sərfəli müqavilələr bağlamışlar.
Azərbaycanın Almatıda keçirilən “KİTF-2013” sərgisindəki ilk iştirakı turizmin bütün sahələrində gələcək üçün də xeyli perspektivlərin açıldığını göstərmişdir.
Bölmənin digər xəbərləri
