ARDNŞ-in “Ekoloji Park”ında seminar keçiriləcəkdir
Bakı, 10 dekabr (AZƏRTAC). Dekabrın 13-də Azərbaycan Respublikası Dövlət Neft Şirkətinin (ARDNŞ) “Ekoloji Park”ında “Azərbaycanda enerji səmərəliliyi və alternativ enerjidən istifadə imkanlarının inkişafı üçün tələbatın qiymətləndirilməsi” mövzusunda seminar keçiriləcəkdir.
ARDNŞ-in mətbuat xidmətindən AZƏRTAC-a bildirmişlər ki, seminar Almaniya Xarici İşlər Nazirliyinin 2012-ci ildə 10 ölkədə dəstəklədiyi “Enerji səmərəliliyi və bərpa olunan enerji mənbələrindən istifadə bacarığının ötürülməsi” proqramı çərçivəsində təşkil ediləcəkdir. Seminarın təşkilatçısı Almaniya Bərpa Olunan Enerji Mənbələri Akademiyasıdır. Tədbirin məqsədi Azərbaycanda bərpa olunan enerjinin inkişaf etdirilməsi üçün təlim ehtiyaclarının aydınlaşdırılması və müəyyən edilmiş ehtiyaclar üzrə 2012-ci ildə beynəlxalq ekspertlərin iştirakı ilə təlim kurslarının təşkil olunmasıdır.
Seminarda bir sıra nazirlik və təşkilatların, özəl sektor və QHT təmsilçilərinin, həmçinin Azərbaycandakı Almaniya səfirliyi nümayəndələrinin iştirakı gözlənilir.
Bölmənin digər xəbərləri
