SİYASƏT
AŞPA-nın sərbəst müzakirələrində Azərbaycana qarşı qərəzli münasibətə son qoyulması tələb olunub
Azərbaycan nümayəndə heyətinin üzvü Rafael Hüseynovun AŞPA-nın payız sessiyasındakı sərbəst müzakirələr zamanı çıxışı ölkəmiz üçün hazırkı dövrdə xüsusilə mühüm əhəmiyyət kəsb edən problemlərə həsr olunmuşdu. R.Hüseynov çıxışında Azərbaycana edilən müxtəlif təzyiqlərdən danışaraq bəzən bunun demokratiya pərdəsi altında həyata keçirildiyini vurğulayıb. O, Azərbaycanın müstəqil siyasətinin bəzi dairələrdə yaratdığı qısqanc münasibətlərə toxunaraq müstəqilliyin əleyhinə olan hər cəhdin qarşısını almaqda millətin və dövlətin yekdil olduğunu söyləyib: “Ortaq evimiz olan Avropa Şurasında birləşən 47 ölkənin hamısını eyniləşdirən başlıca cəhət, ilk növbədə, onların müstəqil dövlətlər olmasıdır. Lakin bu ölkələr arasında, sözün əsl mənasında, tam müstəqil olanlarla yanaşı, təəssüf ki, formal cəhətdən müstəqil olan, apardığı siyasətin xaricdən diktə edilənləri də var. Bizim bu demokratiya ailəsinin daxilində digər üzv dövlətlərin müstəqilliyini məhdudlaşdırmağa çalışanların olması da sirr deyil. Söz yox ki, hər bir dövlət üçün öz müstəqilliyi əzizdir. Lakin Azərbaycan kimi müstəqilliyini bir dəfə itirərək illər sonra yenidən qazanmış ölkələr üçün müstəqillik anlayışı daha böyük dəyər daşıyır. Çünki XX əsrin əvvəllərində qazandığımız dövlət müstəqilliyi tarixin və siyasətin hökmü ilə əlimizdən alınandan sonra biz və bizim kimi bir sıra ölkələr 70 il antidemokratik, repressiv rejim içərisində yaşamağa məcbur olmuşuq. Ona görə də biz uzun həsrətdən sonra yenidən bərpa etmiş olduğumuz müstəqilliyə dəyə biləcək hər zədəyə qarşı son dərəcə həssaslıqla yanaşmağa borcluyuq. Biz müstəqilliyin qədrini eyni dərdi yaşamamış bəzi Avropa ölkələrindən də yaxşı bilirik. Azərbaycanın yeni müstəqillik dövrü ərzində keçdiyi 23 illik yol boyunca bu müstəqilliyə yaxın və uzaq xaricdən xələl gətirməyə müxtəlif cəhdlər bir neçə dəfə baş verib. Lakin ölkə rəhbərliyinin apardığı düzgün siyasət və xalqın yekdilliyi, birliyi nəticəsində bunların qarşısı vaxtında alınıb. Ancaq belə imtahanlar hələ də bitməyib, kənardan müxtəlif siyasi və iqtisadi təzyiqlər davam etməkdədir. Elə həmin kontekstdə mən son dövrlərdə Azərbaycana yönəlmiş arzuolunmaz bir proses barədə düşüncələrimi bölüşmək istərdim. Demokratik islahatlar, söz, mətbuat, vicdan azadlığı bizim prioritetlərdir və bu, Azərbaycanda ardıcıl şəkildə həyata keçirilməkdədir. Lakin son dövrlərdə müşahidə edilən təhlükəli təmayüllərdən biri budur ki, demokratiya anlayışı altında siyasi möhtəkirliyə rəvac verilir. Xarici ölkələrin xüsusi xidmət orqanları tərəfindən maliyyələşdirilən, Azərbaycan dövləti və xalqı əleyhinə işbirliyinə cəlb edilən müəyyən adamlar, xüsusilə bir sıra qeyri-hökumət təşkilatları demokratiya uğrunda mübarizlər kimi qələmə verilirlər”.
R.Hüseynov avropalı deputatların diqqətini bir çoxlarının jurnalist, hüquq müdafiəçiləri, qeyri-hökumət təşkilatlarının məşhur təmsilçiləri kimi tanıdığı müəyyən şəxslərin Azərbaycana zidd fəaliyyətləri ilə bağlı dövlət orqanlarının araşdırmalar apararaq çox ciddi faktlar toplamasına yönəldib: “Məsələnin ayrıca diqqət yetirilməli incə tərəfi isə budur ki, xarici xüsusi xidmət orqanlarının seçdiyi yeni taktikaya uyğun olaraq Azərbaycan əleyhinə agentura şəbəkəsinə bir çox hallarda Azərbaycandan kənarlarda da yaxşı tanınan, demokratlar kimi xarakterizə edilən populyar şəxslər cəlb edilirlər. Məsələn, müəyyən qeyri-hökumət təşkilatlarının, mətbuat qurumlarının təmsilçiləri. Azərbaycan Milli Təhlükəsizlik, Daxili İşlər nazirlikləri, Respublika Prokurorluğunun apardığı araşdırmalar, toplanmış faktlar və dəlillər bu qəbildən olan bir qrup şəxsin vətənə xəyanət kimi dəyərləndirilməli cinayət əməllərini sübut etsə də, məsələni siyasiləşdirmək, həmin cinayətkarları dünyaya vicdan məhbusu kimi təqdim etmək təşəbbüsləri ortaya qoyulmaqdadır. Özünüz nəticə çıxarmağa çalışın. Fərz edək ki, kimsə həqiqətən 1, 2 il əvvələdək demokratik dəyərlərin bərqərar olması, insan haqlarının qorunması yolunda səmimiyyətlə çalışırmış. Lap bu barədə çoxlu məqalələr, kitablar da yazıb. Lakin indi əldə qəti sübutlar var ki, Azərbaycan vətəndaşı olan həmin şəxs üçüncü bir ölkədən Azərbaycanla müharibə aparan, torpaqlarımızı zəbt etmiş Ermənistana səfərlər edib. Bu səfərlərin də təşkilatçısı Ermənistan xüsusi xidmət orqanlarının məlum əməkdaşları olub. Təbii ki, bir azərbaycanlının düşmən vəziyyətində olan ölkəyə belə mütəmadi səfərləri turizm məqsədi daşımayıb.
Əziz həmkarlar, sizin ölkələrin qanunları casuslarla, vətənə xəyanət edənlərlə necə davranır, hansısa keçmiş xidmətlərinə görə belə ağır cinayətlərə göz yumurmu? Demokratiya pərdəsi ardında gizlənərək Azərbaycanın müstəqilliyinə qarşı mübarizə aparanların ölkəmizə qəsbkar niyyətlərlə hərbi təcavüz məqsədi güdənlərdən mahiyyət etibarilə heç bir fərqi yoxdur.
Kənardan başqasına ağıl öyrətmək, məsləhətlər vermək asandır. Amma hərdən gərək özünü məsləhət verdiyinin, ağıl öyrətdiyinin də yerinə qoymağı bacarasan.
Bütün bunlar son dərəcə həssas məsələlərdir və birbaşa bir dövlət və xalq üçün ən ali dəyər hesab edilən müstəqilliklə bağlıdır. Ona görə də burada heç bir güzəştdən söhbət gedə bilməz. Biz güzəşt edə bilmərik. Əgər öz başınıza gəlsə, siz də etməzsiniz”.
Əsgər Əliyev
AZƏRTAC-ın xüsusi müxbiri
Strasburq