Bakı, 14 avqust, Anara Axundova, AZƏRTAC

AZƏRTAC Azərbaycanın populyar blogerləri ilə müsahibələr silsiləsini davam etdirir. Növbəti həmsöhbətimiz Asolia adı ilə də tanınan uğurlu moda blogeri Aysel Mirzəyevadır. O, öz bloqunda dəriyə və saçlara qulluq edilməsi, moda tendensiyaları barədə danışır, həmçinin abunəçilərini məxsusi üslub axtarmağa ruhlandırır.

Aysel AZƏRTAC-a müsahibəsində bloqunu necə inkişaf etdirməsindən bəhs edib və blogerliyə yeni başlayanlara məsləhətlər verib.

- Aysel, blogerliyə necə başladınız?

- Bloqum on il əvvəl yaranıb. Təhsil aldığım Yunanıstandan Azərbaycana qayıtdım. O zaman bizim insanların çoxu əsasən, qara, boz və ya bu rənglərin çalarlarında geyinirdi. Mənim həddən artıq emosional, çox ekstravert təbiətim parlaq, zəngin tərzdə geyinməyi sevir. Sonra düşündüm ki, rənglərin necə birləşdirilə biləcəyini göstərməyin vaxtıdır. İnsanlar rənglərlə oynamağı və onları birləşdirməyi bilmədiyi üçün çox vaxt parlaq geyinmirlər. Bundan əlavə, mən o zaman hamilə idim və çox istəyirdim ki, ana olmağa hazırlaşan qadın gözəl, zərif görünsün, qəşəng paltarlar geyinsin və baxımlı olsun. O, mütləq xalat geyinmək məcburiyyətində deyil, parlaq, maraqlı geyinə, hətta axşam paltarı geyinib hamiləliyini büruzə verə bilər. Bu, həmin vaxt Azərbaycanda birmənalı qarşılanmırdı. Belə tərzləri bloqda göstərməyə başlayanda, mənim sayəmdə ruhlandıqlarını və hamilə olanda parlaq geyindiklərini yazan qızlardan rəylər almağa başladım.

- Hansı məqamda blogerliyin sizin əsas fəaliyyət sahəsi olduğunu anladınız?

- Kifayət qədər uzun müddət bloqu yalnız hobbi hesab edirdim. Marketinq mütəxəssisi kimi işləməyə davam etdim, əsas ofis işim var idi. Ancaq pandemiyadan əvvəl başa düşdüm ki, ya birini, ya da digərini seçmək lazımdır, çünki bloq çox vaxt aparır və tam ştatlı bir işdir. Hətta deyərdim ki, bloqa səhər saat 9-dan axşam 6-ya kimi çalışdığınız bir ofis işindən daha çox vaxt ayırmaq lazımdır. Sən ofisdən çıxdın və işin bitdi. Bloq isə həftədə 24 saat fəaliyyət tələb edir, istirahət günləri və ya bayramlar yoxdur, çünki insanların tətildə olduğu dövrdə onlar sadəcə sosial şəbəkələrə gəlirlər. Bu günlərdə görəcəyim işlər qrafikə sığmır. Müvafiq olaraq, pandemiya başlayanda mənim əsas işim bitdi və artıq başa düşdüm ki, daha çox bloq yazmaq istəyirəm. Pandemiya zamanı buna xeyli vaxt və səy sərf edə bilərdim. İndi marketinq biliklərimi bloqda tətbiq edirəm.

- Dəb, üslub, gözəllik haqqında o qədər çox bloq var ki, orada asanlıqla itə bilərsən. Amma siz bu sektorda uğur qazandınız. Uğurunuzun sirri nədədir?

- Çoxlu sayda abunəçisi olan bloqlar var, amma hesab edirəm ki, bloqumun uğurunun sirri məni çox dəstəkləyən, sadiq və ağıllı auditoriyamın olmasıdır. Düşünürəm ki, uğurumun bir hissəsi də modanın kor-koranə ardınca getməyim deyil, fərdiliyin tərəfdarı olmağımla bağlıdır. Mən trendlərdən danışıram, amma həmişə vurğulayıram ki, qadın özünə uyğun gələndən yapışmalıdır; sizə dəblə geyinməyi göstərməkdənsə, bələdçilik edir, dəyərli məsləhətlər verirəm. Koko Şanel həmişə deyirdi: “Moda keçicidir, amma üslub əbədi olaraq qalır”.

- Ümumiyyətlə, ölkəmizdə moda sənayesini necə xarakterizə edə bilərsiniz?

- İnanılmaz brendlərimiz var! Çox qürur duyuram ki, keyfiyyət, üslub və milli zövq baxımından beynəlxalq arenaya çıxarıla biləcək brendlərimiz mövcuddur. Birtərəfli olmamaq çox vacibdir, çünki dünyada eyni, oxşar brendlər çoxdur. Dünyaya təklif edə biləcəyimiz unikallığımız, Şərq zövqümüz, naxış və motivlərimizdir ki, çoxları bunu yüksək səviyyədə edir.

- İndi blogerlikdən danışaq. Ölkəmizdə bu sahə hansı səviyyədədir?

- İndi blogerlikdən danışaq. Ölkəmizdə bu sahə hansı səviyyədədir?

- Bütün dünyada olduğu kimi, bizdə də çoxlu blogerlər var. Elələri var ki, öz yerini tapırlar. Mikrobloqlarla məşğul olanlar da var, milyonlarla auditoriyaya çatanlar da. Mənə elə gəlir ki, azərbaycanlı blogerlərin əksəriyyəti çox yaxşı səviyyədədir. Mən beynəlxalq blogerləri izləyirəm və hesab edirəm ki, məzmun baxımından bir çox azərbaycanlı blogerlərin yaxşı nəticələri var. Onların bloqları vizual olaraq qurma üsulları sadəcə sözlə ifadə edilə bilməz! Qlobal tendensiyalar nöqteyi-nəzərindən Azərbaycan bir qədər geridədir, lakin buna baxmayaraq, çox sürətlə irəliləyir. Yeri gəlmişkən, son illərin tendensiyası ondan ibarətdir ki, insanlar yenidən “longrid”ə (uzun mətni oxumaq - müəllif) qayıtmaq istəyirlər, nəyisə oxumaq, nəyisə saxlamaq arzusu yaranıb. Blogerin bu sahədə öz təcrübəsi olmalıdır. İnsanlar unikal təcrübələr görmək istəyirlər.

- Blogerliyə yeni başlayanlara nələri məsləhət görərdiniz?

- Bir neçə amili nəzərə almaq lazımdır; birincisi, öz yerini tapmaq, nədə uğur qazana biləcəyinizi başa düşməkdir. İkincisi, videoçarxlar çəkməkdir, çünki bu, sizi çox tez tanıtdıracaq. Üçüncüsü, alqoritmlərdən düzgün istifadə edin, çünki videolarınızı tez bir zamanda viral etmək üçün aydın bir alqoritm var. Gözəl bir mövzu da var - podkastlar, yəni müsahibələr və ya başqaları ilə əməkdaşlıq. Əgər insan öz bloqunu sürətlə inkişaf etdirmək istəyirsə, güclü mühərriklərdən biri hamı ilə, artıq ondan iki-üç addım öndə olanlarla işləməyə başlamaqdır. Artıq nəyəsə nail olmuş insana yaxınlaşıb “mən sizdən müsahibə götürmək istəyirəm” deyirsiniz. Bir insan kiminsə onu dinləmək istəməsindən məmnundur və eyni zamanda, onun platformasından istifadə edərək izləyicilərin diqqətini özünüzə cəlb edirsiniz.

- Həmin adamın razı olacağına zəmanət varmı?

- Sizə rədd cavabı verilməsi riski var. Amma burada yanlış bir şey yoxdur. Bir və ya iki nəfər imtina edəcək, ancaq sizin kimi böyüyən birini tapın və o, əməkdaşlıq etməkdə maraqlıdır, çünki kiminsə onu eşitməsini istəyir.

- Yaxşı, uğurlu blogerlərlə əlaqə saxlamaqdan çəkinməmək lazımdır?

- Qətiyyən yox! İnsanlar danışmaq istəyirlər.

- Aysel, indi eksperiment vaxtıdır. Təsəvvür edin ki, mən sizə bir mütəxəssis kimi müraciətlə imicimi tamamilə dəyişdirməyinizi xahiş edirəm. İndi göründüyüm demək olar ki,

- Oh, əllərim qaşınır! (Gülür.) Baxın, indi sizin çox mülayim, incə və mehriban olduğunuzu göstərmək üçün üslubunuz var. Geyimlərimiz insanlara daxili mesajımızı əks etdirir. Qarşılaşdığınız insanlara nəyi çatdırmaq istəməyinizdən asılı olaraq uyğun geyim tərzi seçməlisiniz. Bir tərəfdən, mən sizin üçün daha təbii çalarları, sakit olanları seçərdim - belə bir emosional tipə sahibsiniz, digər tərəfdən, sizin üzərinizdə çox zəngin rəngləri sınayardım - gözlərinizin rənginə uyğun yaşıl və ya tünd mavi rəngləri vurğulamaq rəng tipinizə uyğun gəlir. Bir az daha parlaq, aktiv aksesuarlar da əlavə edərdim.

- Çox sağ olun! Mütləq cəhd edəcəyəm! Ancaq nəhayət, oxucularımıza bir neçə məsləhət verək; bu yay mövsümünün tendensiyaları hansılardır?

- Ötən yaydan bizim üçün qalan tendensiya şəffaflıqdır. Bunlar uzun şəffaf yubkanın altında qısa ətəklər və ya şortlar, habelə şəffaf köynək altında qapalı üstlər ola bilər. İndi tendensiya açıq çiyinləri, silueti göstərməkdir. Yəni, bir neçə il əvvəl hər şey geniş və kişiyə xas idisə, indi qadınlıq üslubu qayıdıb. Üz və saça gəlincə, yenə minimal makiyaj, sağlam dəri, havalı qıvrım saçlardan danışırıq - sıx deyil, amma sanki dənizə qərq olub oradan çıxmısınız. Rəng baxımından nəyimiz var - yayda ağ, qum çalarları həmişə aktualdır, heç vaxt dəbdən düşmür, yaşıl tonlar - otlu yaşıl, dəniz tonları da trendə daxildir - firuzəyi, mavi rənglər. Zərgərliyə keçsək, bunlar metal zərgərlik, yayda isə dəniz mövzularıdır: balıqqulağı, ulduzlar. Mirvari mövzusu heç vaxt aktuallığını itirmir, amma indi ən zirvədədir. Onları şahzadə Diana və ya Kraliça Elizabet kimi yalnız klassik versiyada taxmaq olmaz. Bu, boynuna bir neçə dəfə bükülmüş uzun mirvari silsiləsi, çiyninə atılan mirvari sapı və ya mirvaridən toxunmuş baş geyimləri ola bilər. Nənənizin incilərini götürə və ona bir növ bəzəkli ip bağlaya bilərsiniz və bu, çox aktual olacaq.

- Biz belə də edirik!

- Bəli, biz belə də edirik! (Gülür.)