Azərbaycan-Birləşmiş Ərəb Əmirlikləri münasibətləri strateji xarakter daşıyır ŞƏRH
Bakı, 23 dekabr, AZƏRTAC
Xüsusilə son illərdə Azərbaycan ilə Birləşmiş Ərəb Əmirlikləri (BƏƏ) arasında münasibətlər sürətlə inkişaf edir. Hətta Azərbaycan BƏƏ ilə strateji əməkdaşlıqla bağlı saziş imzalayıb. Bu sənəd ikitərəfli münasibətlərin tamamilə yeni mərhələyə qədəm qoymasına imkan yaradıb.
Bu fikirləri AZƏRTAC-a açıqlamasında politoloq İlqar Vəlizadə söyləyib.
Onun sözlərinə görə, son ayların təcrübəsi göstərir ki, imzalanmış həmin sənəd, sadəcə, kağız üzərində qalan şüarlardan ibarət deyil. Əksinə, bu razılaşma artıq real proseslərə və konkret addımlara çevrilib.
“Qeyd etmək lazımdır ki, Birləşmiş Ərəb Əmirlikləri Azərbaycanın Yaxın Şərq regionunda ən əsas ticarət və investisiya tərəfdaşlarından biridir. İki ölkə arasında ticarət dövriyyəsinin həcmi təxminən 2 milyard dollar təşkil edir. Bu da Azərbaycanın digər körfəz ölkələri ilə ticarət mübadiləsindən bir neçə dəfə çoxdur. Eyni zamanda, BƏƏ Azərbaycan üçün əsas investorlardan biri hesab olunur. Bu investisiyaların mühüm xüsusiyyəti ondan ibarətdir ki, onlar əsasən ənənəvi enerji sektoruna deyil, qeyri-ənənəvi, yəni yaşıl enerji sahəsinə yönəlir. Yaşıl enerji isə bu gün Azərbaycanın əsas prioritetlərindən biridir. Digər tərəfdən, Birləşmiş Ərəb Əmirlikləri Azərbaycan üçün təkcə iqtisadi deyil, həm də çox vacib siyasi tərəfdaşdır. Burada yalnız iqtisadi münasibətlərdən danışmaq kifayət etməz. Məsələ burasındadır ki, bu il ərzində məhz Əbu-Dabidə Azərbaycanla bağlı yüksəksəviyyəli görüş keçirilib. Bu isə onu göstərir ki, Azərbaycan Əbu-Dabinin təklif etdiyi platformanı qəbul edir və onu özü üçün faydalı hesab edir”, - deyə politoloq bildirib.
İ.Vəlizadə vurğulayıb ki, bu görüş olduqca əhəmiyyətlidir və gələcəkdə bir çox yüksəksəviyyəli görüşlərin uğuru üçün mühüm zəmin yaradır.
“Digər bir vacib məqam isə ölkələrimiz arasında mövcud olan oxşarlıqlardır. Bu amil münasibətlərin inkişafında xüsusi əhəmiyyət daşıyır. Azərbaycan öz regionunda kommunikator rolunu oynayaraq müxtəlif ölkələr arasında əlaqələrin qurulmasına və tənzimlənməsinə töhfə verir. Bu kontekstdə Birləşmiş Ərəb Əmirlikləri də Azərbaycan üçün həm simvolik, həm də praktiki baxımdan körpü rolunu oynayır. Azərbaycan Mərkəzi Asiya ilə Avropanı birləşdirirsə, Birləşmiş Ərəb Əmirlikləri Cənubi Asiyanı – Hindistanı, Pakistanı və ümumilikdə bu regionu Yaxın Şərq və Qərbi Asiya ilə əlaqələndirir. Bütün bunlar isə onu deməyə əsas verir ki, Azərbaycan–Birləşmiş Ərəb Əmirlikləri münasibətləri strateji xarakter daşıyır. Şübhəsiz ki, bu münasibətlərin möhkəm təməlində Azərbaycan Prezidenti İlham Əliyevin və Birləşmiş Ərəb Əmirlikləri Prezidenti Şeyx Məhəmməd bin Zayed Al Nəhyanın müstəsna rolu dayanır. Dövlət başçıları arasında formalaşmış dostluq və qarşılıqlı etimad mühiti ikitərəfli münasibətlərin daha da inkişafı üçün güclü zəmin yaradır”, - deyə politoloq əlavə edib.
Bölmənin digər xəbərləri
