Azərbaycan ilə Pakistanın hərbi-dəniz qüvvələri arasında əməkdaşlıq məsələləri müzakirə edilib

12.04.2018 [01:36]
Çap et
A⁺ A^-

İslamabad, 12 aprel, AZƏRTAC

Azərbaycan Respublikasının Pakistandakı səfiri Əli Əlizadə bu ölkənin Hərbi-Dəniz Qüvvələrinin komandanı, admiral Zəfər Mahmud Abbasi ilə görüşüb.

Görüşdə ölkələrimiz arasında bütün sahələrdə qarşılıqlı dəstəyin daim yüksək qiymətləndirildiyi vurğulanıb. Ermənistan-Azərbaycan, Dağlıq Qarabağ münaqişəsinin və Kəşmir məsələsinin beynəlxalq hüququn norma və prinsipləri, BMT Təhlükəsizlik Şurasının qəbul edilmiş qətnamələri əsasında tezliklə həll olunmasının vacibliyi qeyd olunub.

Zəfər Mahmud Abbasi bildirib ki, Pakistanın Hərbi-Dəniz Qüvvələri Azərbaycan Hərbi-Dəniz Qüvvələrinə dəstək göstərməyə hazırdır.

Görüşdə, həmçinin Azərbaycan ilə Pakistan arasında səmimi dostluq və strateji tərəfdaşlıq münasibətlərinin, hərbi-texniki sahədə əməkdaşlığın davam etdirilməsi, keçirilən təlimlərdə iştirakın mütəmadi təmin olunması, təcrübə mübadiləsi və səfərlərin həyata keçirilməsi haqqında fikir mübadiləsi də aparılıb.

Qulu Kəngərli

AZƏRTAC-ın xüsusi müxbiri

İslamabad