Azərbaycan polisi hər zaman xalqın və dövlətin mənafeyinə ləyaqətlə xidmət edib
Tərtər, 2 iyul, AZƏRTAC
103 illik tarixə malik Azərbaycan polisi şərəfli bir yol keçib, hər zaman xalqın və dövlətin mənafeyinə ləyaqətlə xidmət edib.
AZƏRTAC xəbər verir ki, bu fikir Tərtər rayonunda polis işçilərinin peşə bayramı münasibətilə keçirilən tədbirdə səsləndirilib. Rayonun polis işçiləri ulu öndər Heydər Əliyevin şəhərin mərkəzi meydanda ucalan abidəsi önünə tər gül-çiçək dəstələri düzüb, dahi rəhbərin xatirəsinə ehtiramlarını bildiriblər.
Rayon Polis Şöbəsində keçirilən tədbirdə çıxış edənlər peşə bayramı münasibətilə polis işçilərini təbrik edib, ölkəmizdə sabitliyin və əmin-amanlığın qorunmasında polisin xidmətlərindən danışıblar. Bildirilib ki, Azərbaycan polisi vətəndaşların qanuni mənafelərinin, hüquq və azadlıqlarının müdafiəsi sahəsində üzərinə düşən funksiyaları peşəkarlıqla yerinə yetirir və hər zaman vəzifə borcuna sadiq qalaraq ona bəslənən inam və etimadı doğruldur.
Diqqətə çatdırılıb ki, ulu öndər Heydər Əliyevin respublikamıza rəhbərlik etdiyi dövrlərdə daxili işlər orqanlarının fəaliyyətinin təşkili nəticəsində gücləndirilmiş peşəkar kadr özəyi yaradılıb. Ulu Öndər həmişə polis əməkdaşlarının əməyinə yüksək qiymət verib. Məhz Ümummilli Liderin 1998-ci il 24 may tarixli Fərmanı ilə iyulun 2-si Azərbaycan Polisi Günü kimi qeyd olunur. Bu gün Ulu Öndərin siyasi kursunun layiqli davamçısı, Prezident İlham Əliyevin rəhbərliyi ilə hüquq-mühafizə, o cümlədən daxili işlər orqanlarında həyata keçirən islahatlar, struktur dəyişiklikləri, maddi texniki bazanın möhkəmləndirilməsi, iş şəraitinin yaxşılaşdırılması polis işçilərinə göstərilən diqqət və qayğının bariz nümunəsidir.
Tədbirdə ötən ilin sentyabrın 27-də başlayan və 44 gün davam edən Vətən müharibəsində qazanılan Qələbənin tarixi əhəmiyyətindən bəhs edilib. Bildirilib ki, Azərbaycan daxili işlər orqanlarının əməkdaşları 44 gün davam edən şanlı Vətən müharibəsində də şücaət göstəriblər. Azərbaycan polisi ötən ilin əvvəlindən dünyada geniş yayılmış koronavirus pandemiyası ilə mübarizə dönəmində də üzərinə düşən öhdəlikləri ən yüksək səviyyədə yerinə yetirib, bu gün də pandemiya ilə mübarizədə ön sırada dayanıb və vətəndaşımızın sağlamlığının qorunması üçün gecə-gündüz fasiləsiz xidmət aparır.
Tədbirdə daxili işlər naziri general-polkovnik Vilayət Eyvazovun şəxsi heyətə ünvanladığı təbrik məktubu oxunub.
Sonda xidmətdə fərqlənən bir qrup polis işçisinə fəxri fərman, qiymətli hədiyyələr və pul mükafatı təqdim edilib.
Bölmənin digər xəbərləri
