Azərbaycan qlobal dialoq təşəbbüskarı kimi mövqeyini ardıcıl şəkildə gücləndirir - ŞƏRH
Bakı, 19 mart, AZƏRTAC
Müasir beynəlxalq münasibətlər sistemi dərin struktur transformasiya mərhələsinə daxil olub. Qlobal güc balansının dəyişməsi, regional münaqişələrin intensivləşməsi və beynəlxalq institutların effektivliyinin azalması yeni geosiyasi reallıqlar formalaşdırıb. Məhz belə mürəkkəb bir dövrdə keçirilən XIII Qlobal Bakı Forumu qlobal səviyyədə siyasi dialoq, strateji düşüncə və alternativ yanaşmalar üçün mühüm platforma kimi çıxış edir.
Bu sözləri AZƏRTAC-a açıqlamasında politoloq Yalçın Hacızadə söyləyib.
O bildirib ki, Forumun əsas müzakirə istiqamətlərindən biri beynəlxalq təhlükəsizlik sisteminin transformasiyası oldu. Müasir dövrdə böyük güclər arasında rəqabət dərinləşir, regional münaqişələr qlobal xarakter alır və klassik təhlükəsizlik anlayışı genişlənərək hibrid və kiber təhlükələri də əhatə edir. Eyni zamanda, davam edən müharibələr yalnız regional deyil, qlobal təhlükəsizlik sisteminə təsir edən amil kimi qiymətləndirilir. Yeni dünya nizamı artıq təkqütblü deyil, fraqmentasiya olunmuş və qeyri-sabit xarakter daşıyır.
“Artıq müasir mərhələdə enerji iqtisadi resurs olmaqla yanaşı, geosiyasi təsir alətinə çevrilib. Bu çərçivədə enerji marşrutlarının diversifikasiyası, alternativ mənbələrin inkişafı və enerji təhlükəsizliyinin təmin olunması Forumda geniş müzakirə edildi. Buna görə ölkəmizin də Avropanın enerji təhlükəsizliyində alternativ mənbə, Xəzər regionunun enerji mərkəzi, sabit və etibarlı tərəfdaş kimi çıxış etdiyi qeyd edildi",- deyə Y.Hacızadə vurğulayıb.
Politoloq əlavə edib ki, Forumun müasir çağırışlara cavab verən mühüm istiqamətlərindən biri də iqlim və urbanizasiya məsələləri idi. Müzakirələrdə qeyd olundu ki, iqlim dəyişmələri artıq təhlükəsizlik faktoruna çevrilir, şəhərlər iqtisadi inkişafın əsas mərkəzi olmaqla yanaşı, risk zonalarına çevrilir, “ağıllı şəhər” və yaşıl enerji modelləri qaçılmaz istiqamətdir. Bu kontekstdə şəhərsalma siyasətinin yalnız texniki deyil, strateji və təhlükəsizlik məsələsi kimi dəyərləndirilməsi diqqət çəkirdi.
Müzakirələrdə beynəlxalq təşkilatların, xüsusilə klassik qlobal institutların effektivliyinin azalması xüsusi vurğulandı. Bu vəziyyət yeni əməkdaşlıq formatlarının yaranmasını, regional platformaların rolunun artmasını, qeyri-rəsmi diplomatiyanın güclənməsini zəruri edir. Bu baxımdan Forum alternativ qlobal dialoq mexanizmi kimi çıxış edərək siyasi boşluğu müəyyən qədər doldurur.
“XIII Qlobal Bakı Forumu bir daha göstərdi ki, müasir dünya dərin transformasiya mərhələsindədir və bu mərhələdə dialoq alternativsizdir, çoxtərəfli əməkdaşlıq zəruridir, regional platformaların rolu artır. Forum yalnız müzakirə meydanı deyil, həm də yeni geosiyasi ideyaların və strateji yanaşmaların formalaşdığı intellektual mərkəz kimi çıxış edir. Azərbaycan isə bu prosesdə həm regional lider, həm də qlobal dialoq təşəbbüskarı kimi mövqeyini ardıcıl şəkildə gücləndirir", - deyə politoloq əlavə edib.
Bölmənin digər xəbərləri
