MƏDƏNİYYƏT
Azərbaycan Turizm İnstitutunda “Məzun günü” qeyd edilmişdir
Bakı, 10 iyul (AZƏRTAC). İyulun 10-da Azərbaycan Turizm İnstitutunda (ATİ) “Məzun günü” qeyd edilmişdir.
AZƏRTAC xəbər verir ki, bu münasibətlə keçirilən mərasimdə əvvəlcə Azərbaycanın dövlət himni səsləndirilmişdir.
Tədbirdə ATİ-nin rektoru, professor Cəfər Cəfərov məzunları təbrik etmiş, onlara gələcək həyatlarında uğurlar arzulamışdır. Bildirmişdir ki, cari tədris ilində rəhbərlik etdiyi ali təhsil müəssisəsini 9 ixtisas üzrə 161 məzun bitirmişdir. Onlardan 15-i ATİ diplomu ilə yanaşı, Avstriyanın IMC Krems Tətbiqi Elmlər Universitetinin diplomunu da əldə etmişdir. Prezident İlham Əliyevin müvafiq Sərəncamı ilə Azərbaycanda 2011-ci ilin “Turizm ili” elan edilməsi turizm sənayesinin inkişafının dövlətimizin strateji maraqlarının tərkib hissəsi olduğunu bir daha təsdiqləmişdir. Bu qərarın heç şübhəsiz, ölkəmizdə turizmin inkişafı üçün böyük işlərin görülməsində müstəsna rolu vardır.
Rektor bildirmişdir ki, ATİ-nin məzunları da ölkədə turizmin inkişafına töhfələr verirlər. Məzunlarımızın işlədikləri müəssisələrdə hörmət qazanması bizi hədsiz sevindirir. Builki məzunlara ölkəmizin gələcəyi üçün müasir, bilikli mütəxəssis, layiqli vətəndaş olmağı arzu edirəm. İnanıram ki, bilik və səylərimizi birləşdirərək daha yüksək uğurlar əldə edəcəyik.
Tədbirdə çıxış edən mədəniyyət və turizm naziri Əbülfəs Qarayev məzunları təbrik etmiş, bitirdikləri ali məktəbin adını daim uca tutmağı və Azərbaycanın gələcəyi naminə çalışmağı tövsiyə etmişdir. Bildirmişdir ki, artıq dördüncü dəfə “Məzun günü”nü qeyd edən ATİ Azərbaycanda məzunlara ikili diplom verən yeganə ali məktəbdir. Bu ali təhsil müəssisəsi məzunlarının diplomları artıq dünyada tanınır və onlar müxtəlif ölkələrdə işə qəbul olunurlar.
Nazir, həmçinin Prezident İlham Əliyevin rəhbərliyi ilə ölkəmizdə turizmin inkişafı ilə bağlı görülmüş işlərdən və bu sahədə əldə olunmuş uğurlardan danışmışdır.
Avstriyanın IMC Krems Universitetinin rektoru xanım Eva Verner təhsilini uğurla başa vuran məzunları təbrik etmiş, onlara ən xoş arzularını diləmişdir. O, ATİ-nin məzunlarının Azərbaycanın turizm sənayesinin inkişafına layiqli töhfələr verəcəklərinə əminliyin vurğulamışdır.
Çıxış edən məzunlar da təhsil aldıqları dövrdə onlara yaradılan şəraitə görə ATİ-nin rəhbərliyinə minnətdarlıqlarını bildirmiş, doğma institutun şərəfini daim uca tutacaqlarına, müəllimlərinin və valideynlərinin etimadını doğruldacaqlarına söz vermişlər.
Sonra 2012/2013-cü tədris ilinin bakalavr və magistr məzunlarına ATİ-nin və Avstriyanın IMC Krems Universitetinin diplomları təqdim olunmuşdur.
Sonra cari tədris ili məzunlarından ixtisas, fakültə və institut birincilərinə plaketlər, 2012/2013-cü tədris ili üzrə institutun birincisinə ATİ-nin “Tələbə fəxri kitabı” təqdim edilmişdir.
Həmçinin ümummilli lider Heydər Əliyevin anadan olmasının 90 illik yubileyi münasibətilə Azərbaycan Respublikasının Konstitusiya Məhkəməsinin təşkil etdiyi bilik olimpiadasında, o cümlədən “Mən Azərbaycanlıyam” bilik müsabiqəsində uğur qazanan ATİ-nin tələbələrinə mükafatlar verilmişdir.
Mərasimdə Avstriyanın Azərbaycandakı səfiri xanım Silvia Mayer-Kaybiç, Koreya Respublikasının Azərbaycandakı səfiri Çoi Suk-İn, nüfuzlu otel və turizm sənayesi müəssisələrinin məsul əməkdaşları iştirak etmişlər.
“Məzun günü” maraqlı konsert proqramı ilə başa çatmışdır.