Azərbaycan Turizm İnstitutunun əməkdaşları işçi qruplarının Tbilisidə keçirilən görüşündə iştirak etmişlər
Bakı, 3 iyul (AZƏRTAC). Tbilisi şəhərində Avropa İttifaqının TEMPUS proqramına uyğun “Beynəlxalq bakalavr və magistr proqramları üzrə davamlı turizmin idarə olunması üçün yeni modulların inkişafı” layihəsi çərçivəsində fəaliyyət göstərən işçi qruplarının görüşü keçirilmişdir.
Azərbaycan Turizm İnstitutunun mətbuat xidmətindən (ATİ) AZƏRTAC-a bildirmişlər ki, Gürcüstanın Kənd Təsərrüfatı Universitetində gerçəkləşən görüşün əsas məqsədi qruplar tərəfindən hazırlanan modulların son versiyasını layihə rəhbərliyinə və işçi qruplarının üzvlərinə təqdim etmək olmuşdur.
Tədbiri layihənin əlaqələndiricisi, Almaniyanın Yade Universitetinin təmsilçisi Andrea Menn açaraq işçi qruplarına fəaliyyətlərində uğurlar arzulamışdır.
Görüşdə iştirak edən ATİ-nin prorektoru EldarAslanov bildirmişdir ki, bu layihə Almaniyanın Yade Universiteti ilə ATİ-nin 5 illik əməkdaşlığının bəhrəsidir.
Beş günlük proqram çərçivəsində davam edən dinləmələrdə məlum olmuşdur ki, işçi qruplarının rəhbərləri layihənin 1-ci mərhələsinin həllində də bir sıra göstəricilər qazanmışlar.
Tədbirin son günündə bütün iştirakçıların ümumi rəyi ilə layihənin sonrakı mərhələsi prosesində Avropa İttifaqının TEMPUS proqramına uyğun “Beynəlxalq bakalavr və magistr proqramları sahəsində davamlı turizmin idarə olunması üçün yeni modulların inkişafı” üçün hazırlanacaq yeni modulların mövcud kurikulumlara inteqrasiya edilməsi qərara alınmışdır.
İşçi qrupları tərəfindən hazırlanan modulların təsvirinin təqdimatı ilə tədbirə yekun vurulmuşdur.
Görüşdə növbəti tədbirin cari ilin noyabr-dekabr aylarında müvafiq bilinən ölkələrin, birində tədris materiallarının hazırlanması üzrə keçirilməsi qərara alınmışdır.
Bölmənin digər xəbərləri
