Bakıda “HOREX Caucasus” sərgisi keçiriləcəkdir
Bakı, 8 mart (AZƏRTAC). Aprelin 4-dən 6-dək Bakıda “HOREX Caucasus-2013” VII Qafqaz Beynəlxalq mehmanxanalar, restoran və supermarketlər üçün avadanlıq və ləvazimatlar sərgisi keçiriləcəkdir.
“İteca Caspian” şirkətindən AZƏRTAC-a bildirmişlər ki, “AİTF-2013” ilə birgə keçiriləcək “HOREX Caucasus-2013” sərgisi son illər Azərbaycanda otel biznesi sahəsində müşahidə olunan inkişafın təsdiqidir.
Sərginin ekspozisiyasında ən məşhur brendlər və bu sahənin aparıcı şirkətləri təmsil olunacaqlar. “HOREX Caucasus-2013”ün əsas bölmələrinə mehmanxana və restoranlar üçün müasir mətbəx avadanlığı, restoranlar şəbəkəsi üçün idarəetmə üzrə proqram təminatı, yataq dəstləri, mehmanxanalar üçün gigiyenik və kosmetik vasitələr daxildir.
Sərgi çərçivəsində bu il ilk dəfə olaraq supermarketlər üçün alış-veriş arabaları və digər ləvazimatlar da təqdim olunacaqdır. Otel, restoran və kafelər (“HoReCa”) üçün içkilər bölümündə çay, qəhvə, su, eləcə də müxtəlif markalı şərablar nümayiş etdiriləcəkdir.
Beynəlxalq sərgidə Azərbaycan, Almaniya, İtaliya, Lüksemburq, Türkiyə və Rusiyanın müxtəlif şirkətləri təmsil olunacaqlar.
“HOREX Caucasus-2013” “AITF-2013” XII Azərbaycan Beynəlxalq turizm və səyahətlər sərgisi çərçivəsində keçiriləcəkdir.
Bölmənin digər xəbərləri
