Berlində 30-cu Beynəlxalq Təhsil Sərgisinə yekun vurulub VİDEO
Berlin, 4 noyabr, AZƏRTAC
Bu gün Berlində keçirilən 30-cu Beynəlxalq Təhsil Sərgisi (ICEF-2025) işini başa çatdırıb.
AZƏRTAC xəbər verir ki, yubiley sərgisinə dünyanın 115-dən çox ölkəsini təmsil edən 1300 təhsil müəssisəsi qatılıb.
Azərbaycanı bu nüfuzlu sərgidə 20-dən çox təhsil müəssisəsi təmsil edib. Azərbaycanın təhsil müəssisələri ICEF tədbirlərində aktiv iştirak edərək beynəlxalq əməkdaşlıq əlaqələrini genişləndirir. Bu platforma vasitəsilə ölkəmizdən olan tələbələr üçün xarici ölkələrin qabaqcıl universitetlərində ali təhsil, peşə təhsili və dil proqramlarına çıxış imkanları yaradılır. Təhsil müəssisələri və agentliklər arasında qurulan işgüzar əlaqələr ölkəmizin tələbələrinin keyfiyyətli beynəlxalq təhsil almasını dəstəkləyir və təhsil sektorunun qlobal şəbəkədə mövqeyini gücləndirir. Bu əməkdaşlıq, eyni zamanda, təhsil sahəsində qarşılıqlı təcrübə və innovasiyaların mübadiləsinə şərait yaradır.
Azərbaycanı sərgidə təmsil edən belə təhsil müəssisələrindən birinin - ARI Beynəlxalq Təhsil Mərkəzinin rəhbəri İnarə Əliyeva AZƏRTAC-a müsahibəsində bildirib: “Berlində keçirilən “ICEF-2025” beynəlxalq təhsil sərgisində 115 ölkədən 1300-dək beynəlxalq təhsil qurumunun nümayəndələri iştirak edirlər. Ölkəmizdən də bir çox təhsil qurumunun bu nüfuzlu sərgidə iştirakı bizim üçün qürurvericidir. Bu cür beynəlxalq tədbirlərdə iştirak etmək Azərbaycanın təhsil təşkilatları üçün çoxsaylı əməkdaşlıqlar qurmaq, eyni zamanda, azərbaycanlı tələbələr üçün geniş imkanlar yaradır. Bu platformalar sayəsində azərbaycanlı tələbələr üçün uyğun olan universitetləri, qəbul şərtləri, təhsil proqramlarını seçərək tələbələrə və onların ailələrinə daha düzgün və dəqiq məlumatlar vermiş oluruq ki, bu da tələbələrin təhsil almaları yolunda çox önəmlidir. İnanırıq ki, azərbaycanlı tələbələrin uğurlarında təhsil qurumlarının göstərdiyi peşəkar dəstək, məlumatlandırma və düzgün istiqamətləndirmə mühüm rol oynayır. Təhsil bizim gələcəyimizdir və bu baxımdan bizim təhsil qurumlarımızın beynəlxalq səviyyədə keçirilən belə sərgilərdə iştirak etməsi çox önəmlidir”.
Qeyd edək ki, beynəlxalq tələbə qəbuluna dair dünyanın ən nüfuzlu tədbir kimi tanınan ICEF qlobal təhsil sektorunun inkişafına mühüm təsir göstərir. Bu mötəbər tədbirdə dünyanın müxtəlif ölkələrindən minlərlə təhsil lideri bir yerə toplanaraq yeni tərəfdaşlıqlar qurur və beynəlxalq tələbələr üçün yeni imkanlar yaradır. Üçgünlük sərgi çərçivəsində keçirilən 25 mindən artıq təkbətək görüşlər “ICEF Berlin”i real işgüzar nəticələrin əldə olunduğu qlobal platformaya çevirir. Bu sərgi iştirakçılara müxtəlif ölkələrdən təhsil mütəxəssisləri ilə görüşmək, yeni əlaqələr qurmaq, sahə üzrə tanınmış ekspertlərin rəhbərliyi ilə keçirilən seminar, müzakirələrdə iştirak etmək, həmçinin beynəlxalq tələbə qəbulunu keyfiyyət və dayanıqlılıq əsasında inkişaf etdirmək üçün strateji yanaşmalar formalaşdırmaq imkanı verir.
Berlin
Bölmənin digər xəbərləri
