SİYASƏT
BERLİNDƏ “AZİZ-ALMANİYA” BEYNƏLXALQ ASSOSİASİYASI “MƏNİM AZƏRBAYCANIM” ADLI TƏDBİR KEÇİRMİŞDİR
Azərbaycanın Almaniyadakı səfirliyindən AZƏRTAC-ın xüsusi müxbirinə bildirmişlər ki, Berlində fəaliyyət göstərən “AZİZ-Almaniya” Beynəlxalq Assosiasiyası “Mənim Azərbaycanım” adlı tədbir keçirmişdir.
Tədbirin aparıcısı “CNN” telekanalının Almaniya üzrə nümayəndəsi, jurnalist Mixael Kayzer olmuşdur. M.Kayzer mərasim iştirakçılarının əksəriyyətinin yəhudi mənşəli azərbaycanlılar olduğunu qeyd etmiş, belə tədbirlərin əsas qayəsinin də həmin insanların öz vətənləri Azərbaycanla əlaqələrinin kəsilməməsindən, eləcə də onların həyatına sirayət etmiş Azərbaycan mədəniyyəti ünsürlərinin, adət-ənənələrinin qorunub saxlanmasından ibarət olduğunu bildirmişdir.
“AZİZ-Almaniya” Beynəlxalq Assosiasiyasının rəhbərləri - xanım Yael Frankfurt və Adil Bayramov tədbirdə çıxış etmişlər. Adil Bayramov Azərbaycan barədə, ölkədə gedən ictimai-siyasi proseslər, son illərdə müşahidə olunan iqtisadi yüksəliş haqqında ətraflı məlumat vermişdir.
Azərbaycanın Almaniyadakı səfirliyinin əməkdaşlarının da qatıldığı tədbirdə səfirliyin birinci katibi Almaz Məmmədov oktyabrın 15-də prezident seçkilərində dövlətimizin başçısı İlham Əliyevin böyük üstünlüklə qələbəsi, eləcə də ölkəmizin iştirakçısı olduğu irimiqyaslı layihələr barədə danışmış, Almaniyada Azərbaycan İli çərçivəsində silsilə mədəniyyət tədbirlərinin uğurla davam etdiyini, belə toplantıların mədəniyyət ilinə töhfə olduğunu bildirmişdir.
Tədbirdə təşkilatın İsrailin paytaxtı Təl-Əviv şəhərində yerləşən mərkəzi ofisinin təmsilçiləri də iştirak etmişlər. Səfirliyin əməkdaşları Berlindəki rusdilli telekanala və Berlinin “Multi-Kulti” radiosuna müsahibə vermişlər. Xarici Ölkələrdə Yaşayan Azərbaycanlılarla İş üzrə Dövlət Komitəsinin dəstəyi ilə Azərbaycana həsr edilmiş materiallar iştirakçılara təqdim edilmişdir.
Sonda iştirakçılar Azərbaycan mətbəxinin ləziz xörəklərindən ibarət süfrəyə dəvət edilmiş, Almaniyada yaşayan Azərbaycan və yəhudi incəsənət xadimlərinin birgə təqdimatında Azərbaycan musiqisi səslənmişdir.