Berlində mikroavtobusla hücum törətməkdə şübhəli bilinən şəxs polis tərəfindən zərərsizləşdirilib
Berlin, 27 iyul, AZƏRTAC
Berlində mikroavtobusu insanların üzərinə sürərək 1 nəfərin ölümünə və 16 nəfərin xəsarət almasına səbəb olan hadisəni törətməkdə şübhəli bilinən şəxs polisin keçirdiyi əməliyyat zamanı zərərsizləşdirilib.
AZƏRTAC yerli mediaya istinadla xəbər verir ki, hücumu törətməkdə təqsirləndirilən 21 yaşlı şəxsin Berlinin Şpandau rayonundakı bağ evlərindən birində gizləndiyi məlum olub. Polis əməkdaşlarının həmin ünvanda keçirdikləri xüsusi əməliyyat zamanı şübhəli şəxs hüquq-mühafizə orqanlarının əməkdaşlarına soyuq silahla hücum edib. Polis yaranmış təhlükəni zərərsizləşdirmək məqsədilə ona atəş açıb və şübhəli şəxs aldığı güllə yaralarından hadisə yerində ölüb.
Hadisə ilə bağlı istintaqı Almaniya Federal Baş Prokurorluğu icraatına götürüb. İstintaq çərçivəsində hücumun motivləri və şübhəlinin mümkün əlaqələri araşdırılır.
Xatırladaq ki, iyulun 25-də axşam saatlarında Berlində “Christopher Street Day” yürüşünün keçirildiyi ərazinin yaxınlığında mikroavtobus piyadaların üzərinə sürülmüşdü. Nəticədə bir nəfər həlak olmuş, 16 nəfər müxtəlif dərəcəli bədən xəsarətləri almışdı. Hadisədən sonra şübhəli şəxs ərazidən qaçmağa müvəffəq olmuş, onun saxlanılması məqsədilə Berlin polisi və federal hüquq-mühafizə orqanları tərəfindən genişmiqyaslı əməliyyat-axtarış tədbirləri həyata keçirilmişdi.
Bölmənin digər xəbərləri
