Bakı, 26 sentyabr, AZƏRTAC

Beynəlxalq Gəmiçilik Palatasının (ICS) üzvü olan gəmi sahiblərinin 42 faizi öz donanmasına pilotsuz suüstü gəmiləri (PSG) daxil etməyə hazırdır.

AZƏRTAC xarici KİV-lərə istinadla xəbər verir ki, bu barədə Beynəlxalq Gəmiçilik Palatasının baş meneceri Qreqor Stivens “Neva 2023” beynəlxalq gəmiçilik sərgisi çərçivəsində çıxışında deyib.

Gəmi sahiblərinin qeyd etdiyi PSG-in əsas üstünlükləri gəmidə insanların sayının azalması və gəmi tədarükü azaldığından daşınan yüklərin həcminin artmasıdır (heyət üçün ərzaq ehtiyatının daşınmasına ehtiyac yoxdur).

Dənizçilərə yüksək tələbatdan danışan Qreqor Stivens bildirib ki, dünya gəmiçiliyinin tələbatını ödəmək üçün ildə təxminən 70 min komandir heyəti yetişdirilməlidir. “Bir çox ölkələrdə əhalinin qocaldığını nəzərə alsaq, hər il bu qədər yeni mütəxəssis yetişdirmək getdikcə çətinləşir. Buna görə də assosiasiyamızın bir çox üzvü çıxış yolu kimi PSG-ni görürlər”, - Qreqor Stivens bildirib.

Q.Stivens bildirib ki, 2021-ci ildə dünya donanmasında ən çox dənizçi Filippin, Rusiya, İndoneziya, Çin və Hindistan kimi ölkələrdən olub.

“Uzunmüddətli perspektivdə biz gələcəyi pilotsuz dəniz gəmilərində görürük. 2028-ci ildən Beynəlxalq Dəniz Təşkilatı (IMO) pilotsuz gəmilərin tam potensialından həqiqətən istifadə etmək üçün PSG-lərin naviqasiyada iştirakını məcburi hesab edir”, - deyə o vurğulayıb.