Beynəlxalq Sosial İşçilər Federasiyasının baş katibi Azərbaycan Turizm institutunda olmuşdur
Bakı, 3 may (AZƏRTAC). Azərbaycan Sosial İş İctimai Birliyinin dəvəti ilə ölkəmizdə səfərdə olan Beynəlxalq Sosial İşçilər Federasiyasının (BSİF) baş katibi Rori Truel Azərbaycan Turizm institutunda (ATİ) olmuşdur.
ATİ-dən AZƏRTAC-a bildirmişlər ki, görüşdə bu ali məktəbin rektoru, professor Cəfər Cəfərov institutun yeddi illik fəaliyyəti barədə qonağa ətraflı məlumat vermişdir.
BSİF-nın baş katibi Beynəlxalq Sosial İşçilər Federasiyasının Dünya Səhiyyə Təşkilatı, BMT-nin Qaçqınlar və İnsan Hüquqları üzrə ali şuraları ilə yaxından əməkdaşlıq etdiyini bildirmişdir. O, 85 il bundan əvvəl sosial iş üzrə beynəlxalq konfrans tərəfindən əsası qoyulmuş BSİF-də dünyanın 90 ölkəsinin təmsil olunduğunu, sosial inkişaf və sosial işin təbliği, habelə bu sahədə ən yaxşı təcrübə modellərinin qurumun fəaliyyət proqramında yer aldığını bildirmişdir.
Qonaq ATİ-də sosial iş ixtisası üzrə kadr hazırlığının həyata keçirildiyindən xəbərdar olduğunu, elə bu səbəbdən təkliflərlə gəldiyini diqqətə çatdırmışdır.
Görüşdə yeni kurikulum dizaynı, sosial iş ixtisası təcrübəsinin müasirləşdirilməsi sahəsində ATİ-yə dəstək verilməsi, ixtisas üzrə magistr və fəlsəfə doktoru proqramlarının tətbiqinə kömək etmək qərara alınmışdır.
Bölmənin digər xəbərləri
